«Ja nie viedaŭ ni pra jaki mitynh». Doktaru-ankołahu dali štraf 675 rubloŭ
U sudzie Frunzienskaha rajona vyniesiena pastanova pa spravie minskaha doktara-ankołaha Viktara Chvaščeŭskaha. Jaho pryznali vinavatym va ŭdziele ŭ niesankcyjanavanym mitynhu i supraciŭleńni zakonnym patrabavańniam milicyi, vynik — štraf 25 bazavych. Doktar pryznaŭ, što ŭviečary 19 červienia byŭ na praśpiekcie Dziaržynskaha, ale łozunhi nie vykrykvaŭ i nie admaŭlaŭsia iści ŭ aŭtazak z amapaŭcami, piša Tut.by.
U Viktara Chvaščeŭskaha ŭ pratakole zapisana toje ž, što i ŭ inšych zatrymanych 19 červienia na Hrušaŭcy +- aktyŭny ŭdzieł u niesankcyjanavanym mitynhu, vykrykvańnie łozunhaŭ, admova prajści ŭ słužbovy transpart z supracoŭnikami milicyi.
— Ja ŭ toj viečar jechaŭ u kniharniu, nie viedaŭ ni pra jaki mitynh. Ubačyŭ, što staić siastra majoj adnakłaśnicy, jana vyjšła na špacyr z sabakam, padyšoŭ, my dzieści paŭhadziny razmaŭlali. Ja bačyŭ, što tam sabralisia ludzi, ale my prosta razmaŭlali, ničoha nie vykrykvali, — rastłumačyŭ Viktar Chvaščeŭski. — Mianie zatrymaŭ AMAP. Ja vykonvaŭ ich patrabavańni, tamu što razumieŭ, inakš budzie jašče horš. Nijakaha supracivu nie akazvaŭ.
Śviedki siarod supracoŭnikaŭ AMAPa zajavili, što ŭpeŭnienyja: Chvaščeŭski parušaŭ hramadski paradak, tamu na jaho i skłali pratakoł ab administracyjnym pravaparušeńni.
Kiroŭca-milicyjanier Vital Zinovik błytaŭsia ŭ pakazańniach, choć mienavita jon skłaŭ rapart, pakładzieny ŭ asnovu administracyjnaj spravy.
Druhi śviedka — milicyjanier AMAPa Alaksandr Paŭlukievič. Pavodle jaho viersii, doktar Chvaščeŭski patrabavaŭ svabody dla Statkieviča, a nie dla Cichanoŭskaha. Jak i kaleha, Paŭlukievič šmat čaho nie pamiataje pra padziei taho viečara.
Da materyjałaŭ spravy dałučana charaktarystyka ź miesca pracy doktara Chvaščeŭskaha, dzie paznačana, što jon vysakakłasny chirurh-ankołah, adkazny čałaviek. Padtrymać jaho ŭ sud siońnia pryjšli rodnyja, siabry i kalehi. Jon ubačyć ich nie zmoh, pakolki davaŭ tłumačeńni pa skajpie z adździaleńnia milicyi i, jak sam nieadnarazova zajaŭlaŭ, amal ničoha nie čuŭ z zały suda z-za prablem suviazi.
Viktar Chvaščeŭski ŭ kancy pasiadžeńnia skazaŭ, što spadziajecca na spraviadlivaść suda. Sudździa Ała Skuratovič paličyła, što vina doktara paćvierdžana całkam i pastanaviła spahnać ź jaho štraf 25 bazavych vieličyń (675 rubloŭ).
Kamientary