Sacyjalnyja sietki niervova adreahavali na brutalnyja zatrymańni mirnych hramadzian 18-21 červienia i nastupnyja sudy pa ŭsioj krainie. Siłavikoŭ, jakija mieli nieaściarožnaść asabliva prajavić siabie padčas chapuna, imhnienna identyfikoŭvali.
Kab padtrymać u vačach hramadstva davier da skampramietavanych pravaachoŭnych instytutaŭ, u sacyjalnych sietkach stychijna pačali źjaŭlacca paŭananimnyja śviedčańni taho, što nie ŭsie ludzi ŭ pahonach hatovyja vykonvać sprečnyja zahady.
Heta prajaŭlajecca tak: viadučym palityčnym błohieram praz formu zvarotnaj suviazi pačali prychodzić fota ŭ formie, abo słužbovyja paśviedčańni, abo inšy indentyfikatar naležnaści da siłavoj struktury. Z dabaŭlenaj palityčnaj remarkaj.
Robicca heta ŭsio pad teham #pahonypobač.
Supravadžalnaja ličba «97%» — heta palityčny humar, jaki simvalizuje vyniki internet-hałasavanak ab padtrymcy Łukašenki, u jakich jon nabiraŭ 3%. Adpaviedna — ludzi pryličvajuć siabie da astatnich 97%.
U sacyjalnych sietkach užo dziasiatki takich publikacyj. Nie ŭsim im možna biezumoŭna daviarać, ale niešta vyhladaje dosyć praŭdapadobna.
Da hetaha fłešmobu dałučylisia pradstaŭniki badaj što ŭsich siłavych struktur: KDB, AAC, vojska, SK, Prakuratura, roznyja padraździaleńni MUS — ad DAI da HUBAZiK.
Nakolki viadoma «Našaj Nivie», u niekatorych adździełach ad učora byŭ abvieščany režym tryvohi: słužby ŭłasnaj biaśpieki praviarajuć u supracoŭnikaŭ tyja rečy, pa jakich možna identyfikavać «reniehataŭ».
Užo viadomyja roznyja mietady pošuku: ažno da vymiareńnia milimietrovaj liniejkaj vodstupaŭ ad piačatak. Ale pakul nie čuvać ni pra adnaho identyfikavanaha.
Viadoma taksama, što ŭ niekatorych słužbach siońnia musova praviarajuć mabilnyja telefony ŭ spadzievie znajści niešta ideałahična «zabaronienaje» kštałtu padobnych fotazdymkaŭ ci čataŭ u miesiendžarach z palityčnymi błohierami.
Tyja, chto admaŭlajecca pakazvać telefon, nibyta traplajuć pad padazreńnie.
U niekatorych adździełach načalstva źviartajecca da słužačych z zastrašvańniem i apisańniem mahčymych nastupstvaŭ u vypadku ŭdziełu ŭ fłešmobie #pahonypobač.
Ale niama śviedčańniaŭ, što dziejańni słužbaŭ ułasnaj biaśpieki viedamstvaŭ niejak źmianšajuć maštab źjavy: ledź nie štohadzinu ŭ sacyjalnych sietkach źjaŭlajucca novyja fota, a da hetaha fłešmoba dałučajucca inšyja rabotniki dziaržaŭnych ustanoŭ — ad miedykaŭ da žurnalistaŭ.