Unikalny vypadak dla Biełarusi: połackija miedyki ŭratavali piensijanierku z karanavirusam paśla 44 dzion na ŠVŁ

Siońnia piensijanierka Halina Rubanava ŭžo pavoli pierasoŭvajecca pa kvatery. Kab adnavicca, kožny dzień imkniecca rabić himnastyku, vykonvać rekamiendavanyja śpiecyjalistami praktykavańni. I ŭvieś čas z padziakaj uspaminaje svaich vyratavalnikaŭ, piša sajt Vitiebskije viesti.

Pavialičyć

— Mianie dahladali jak rodnuju. Vialiki dziakuj ad usiaho serca kožnaj sanitaračcy, miedsiastry, doktaru, kiraŭnikam padraździaleńniaŭ. Heta sapraŭdy śviatyja ludzi, — havoryć Halina Alaksandraŭna.

Svajo vyzdaraŭleńnie jana paraŭnoŭvaje z cudam. Ale za hetym cudam — najvyšejšy prafiesijanalizm, samaaddanaść i dabrynia sercaŭ rabotnikaŭ Połackaj centralnaj haradskoj balnicy, a taksama siła duchu samoj pacyjentki, jakaja nie paddałasia adčaju ŭ ciažkich abstavinach.

Chvaroba raźvivałasia imkliva. Kali pačalisia kašal i bol miž rebrami, pałačanka vyklikała chutkuju dapamohu. Proźvišča maładoha fielčara, jaki pryjechaŭ, Halina Alaksandraŭna nie viedaje, ale ŭdziačnaja jamu za toje, što svoječasova pačuŭ šumy ŭ lohkich i adrazu prapanavaŭ špitalizacyju. Padziei, jakija adbylisia dalej, jana pamiataje ŭryŭkami, bo vialikuju častku času praviała biez prytomnaści. Adnavić chranałohiju dapamahli svajaki i ŭračy.

Zahadčyk pulmanałahičnaha adździaleńnia Połackaj haradskoj balnicy №1 Dzianis Novajenka raspavioŭ, što ŭžo praz dva dni paśla pastupleńnia 67-hadovuju žančynu pryjšłosia pieravieści ŭ reanimacyju. U jaje ŭźniałasia tempieratura, abśledavańnie na KT vyjaviła virusnuju pnieŭmaniju ciažkaj stupieni.

Pacyjentku adrazu ž padklučyli da aparata štučnaj vientylacyi lohkich, jaki dychaŭ za jaje 44 dni. A ŭ cełym lačeńnie praciahvałasia 79 dzion. Viartańnie da narmalnaha žyćcia paśla takoha doŭhaha najciažejšaha stanu — unikalny vypadak i dla Połacka, i dla ŭsioj Biełarusi. Pastupova nasyčeńnie arteryjalnaj kryvi kisłarodam palapšałasia. Halina Alaksandraŭna pačała dychać samastojna, ale paśla dzieviaci kursaŭ antybijotykaterapii i doŭhaha času, praviedzienaha pad narkozam u štučnaj komie, była zusim asłablenaja. Tamu važnuju častku lačeńnia skłali reabilitacyjnyja mierapryjemstvy — masaž, fizkultura, dychalnaja himnastyka. A hałoŭnaje — niaspynny dohlad, padtrymka, uvažlivaść, dobrazyčlivaść usiaho miedycynskaha piersanału.

- Praca była zroblena kałasalnaja. My vieryli ŭ pieramohu. Heta ahulny pośpiech, u jaki ŭkładziena duša kožnaha našaha supracoŭnika, — adznačyła zahadčyca haradskoj balnicy №1 Žanna Kanavałava.

Značnym faktaram adužańnia jana ličyć siłu voli pacyjentki, jaje nastrojenaść na pazityŭny vynik. Kali čałaviek unutrana zdajecca, chvaroba moža nie adstupić, a kali zmahajecca — uklučajucca dadatkovyja reziervy arhanizma. U lubych samych składanych situacyjach nielha padać ducham.

I Halina Rubanava dakazała heta. Joj treba budzie prajści jašče doŭhi šlach kančatkovaha vyzdaraŭleńnia, ale jana praciahvaje zastavacca bajcom. Jak by ni było ciažka, pracuje nad saboj: starajecca pierasilić bol, ustać z łožka i chadzić. Kaža, što jość dziela kaho žyć. Chočacca jašče paradavacca pośpiecham dziaciej i ŭnukaŭ, pahladzieć, jak raście samy juny spadčyńnik rodu — praŭnučak Romka, jakoha ŭnučka naradziła, pakul Halina Alaksandraŭna była ŭ balnicy.

• 0
• 0
• 0
• 0
• 0
• 0
• 0
• 0