Boty deputata rasijskaj Dziarždumy stali ščyravać pad dopisami biełaruskich prapahandystaŭ
Na cikavuju zakanamiernaść źviarnuŭ uvahu analityk Andrej Jelisiejeŭ.
Zajmalna, što za Łukašenku «topiać» tyja ž Facebook-akaŭnty, što i za rasiejskaha deputata Leanida Słuckaha, dałučalnika Kryma.
U padtrymku Łukašenki ŭ apošnija paru miesiacaŭ zaŭvažna aktyvizavałasia dziejnaść psieŭdaakaŭntaŭ i ŭ siekcyjach kamientaroŭ papularnych sajtaŭ, i ŭ sacyjalnych sietkach. Na asobnyja naviny i natatki raptam nalatajuć dziasiatki i sotni «kamientataraŭ» z adnatypnymi pastami.
Tak zdaryłasia i z dopisam u Facebook biełaruskaha prapahandysta Andreja Kryvašejeva pra nibyta rassakrečany «supiersakretny» dakumient. Pad im źjavilisia dziasiatki zusim adnatypnych pastoŭ kštałtu «Za baćku!» i «ARŁ pa-za kankurencyjaj!». Darečy, na dniach stała viadoma, što Kryvašejeŭ staŭ adnoj z davieranych asob Łukašenki.
Pry bližejšym razhladzie akazvajecca, što mnostva kamientaroŭ pad rezanansnym dopisam Kryvašejeva nie naležyć realnym ludziam — jany źjaŭlajucca tak zvanymi botami. Jašče cikaviejšaje toje, što samaja bujnaja z hrup botaŭ, jakija arudujuć pad pastom Kryvašejeva, paśladoŭna prasoŭvaje pasty rasiejskaha deputata Leanida Słuckaha, kiraŭnika kamiteta Dziarždumy ŭ mižnarodnaj palitycy.
Prosta Słucki zabiaśpiečvaŭ lehitymizacyju krymskaha refierendumu ŭ 2014 hodzie praz pryvoz marhinalnych jeŭrapiejskich palitykaŭ. A ŭ minułym miesiacy paŭtaryŭ hetuju misiju, zabiaśpiečyŭšy pryjezd u Krym «salidnaj delehacyi deputataŭ Jeŭraparłamienta» z nahody refierendumu pa papraŭkach u rasiejskuju kanstytucyju.
Na minułym ža tydni, napiaredadni siesii Parłamienckaha schodu Sajuza Biełarusi i Rasii, Słucki zajaviŭ rasijskim ŚMI: «Rasija i Biełaruś navat, moža być, nie brackija krainy i narody, a, jak skazaŭ Alaksandr Łukašenka niekalki hadoŭ tamu, my adziny narod, u siłu histaryčnych pryčyn padzieleny dziaržaŭnaj miažoj». Voś taki cikavy pasył. Pikantnaści ŭsioj hetaj historyi dadaje toj fakt, što mahistralnym pasyłam ciapierašniaj «vybarčaj kampanii» Łukašenki źjaŭlajecca pryncypovaja abarona suvierenitetu i niezaležnaści Biełarusi.
Voźmiem, naprykład, adzin z zusim niadaŭnich Facebook-pastoŭ Słuckaha (8 lipienia), u jakim havorycca pra «źviaryny ehaizm» ZŠA.
Jon atrymaŭ bolš za sotniu šeraŭ. Siarod inšaha, pa čatyry šery — ad FB-akaŭntaŭ Yuriy Harkusha i Alena Kozačkina (tak-tak, pa čatyry — heta pra «razdźmutuju» papularnaść dopisaŭ niekatorych rasijskich deputataŭ), try — ad Iryny Jurjevaj, pa dva — ad Hanna Viesiałova i Irina Veselova, šery ad Uładzimira Čabana i Sania Smagina.
A voś što kožny z hetych akaŭntaŭ napisaŭ pad pastom Kryvašejeva:
Ahułam adnatypnyja «prychilniki Łukašenki» pad pastom Kryvašejeva zabiaśpiečyli jak minimum 17 šeraŭ antyamierykanskamu dopisu Słuckaha. Jany ž šmatkroć dzialilisia i inšymi niadaŭnimi natatkami rasijskaha palityka.
Na samaj spravie, supadzieńniaŭ botaŭ, jakija «pracavali» pad zhadanymi pastami Kryvašejeva i Słuckaha, našmat bolš. Prosta praz nałady pryvatnaści mnohija akaŭnty, jakija padzialilisia dopisam Słuckaha, adrazu nie identyfikujucca.
Ale mnohija inšyja psieŭdajuziery, jakija jak minimum załajkali post Słuckaha (uklučajučy akaŭnty z takimi redkimi imionami, jak Luda Ilika, Art Gus, Marbela Perez Rengifo) taksama prapijaryli Łukašenku pad pastom Kryvašejeva.
Hetaja ž botafierma, siarod inšaha, vielmi zaniepakojena losam Badziejeŭskaha zavoda ŭ Maskvie i rupicca za prasoŭvańnie asobnych anłajn-kazino i fotamadelaŭ.
Kamientary