«Śvieta, Śvieta», — tysiačy barysaŭcaŭ kranalna sustreli Cichanoŭskuju FOTY
Mitynh u Barysavie byŭ druhim vyjezdam Śviatłany Cichanoŭskaj i jaje paplečnic u rehijony, ale pajezdka ŭ Dziaržynsk prajšła biez naležnaj rekłamy, dy i prachodziła ŭžo zusim na ŭskrajku horada. Tamu možna ličyć, što mienavita z Barysava pačałosia turne alternatyŭnaj kandydatki pa krainie.
Sustreča prachodziła kala ŭniviermaha «Viesta» — heta nie centr, ale i ŭskrajkam nazvać ciažka. Pobač adnosna maładyja rajony la vulicy Trusava i bulvara Hrečki, kinateatr «Kastryčnik», aŭtavakzał. Možna skazać, što ŭ vialikaj častcy barysaŭcaŭ heta takoje tusovačnaje miesca. Praŭda, sama placoŭka akazałasia zusim maleńkaj, a jašče z raźbitymi chodnikami. U vyniku mienavita na placoŭcy ŭsie achvočyja raźmiaścicca nie zmahli.
Prykładna tut sama prachodziła sustreča z Alaksandram Milinkievičam u 2006 hodzie — heta była adna z apošnich pajezdak kandydata. Na zaśniežanuju placoŭku kala «Viesty» pryjšło kala 500 čałaviek. Ciapier było minimum razoŭ u šeść bolej. Ja nie pamiataju nivodnaj palityčnaj akcyi ŭ Barysavie, jakaja b źbirała bolš za 3 tysiačy čałaviek. Takoha nie było ni ŭ kampaniju 2010 hoda, ni ŭ maŭklivuju revalucyju, ni ŭ pratesty darmajedaŭ.
Praŭładnyja telehram-kanały zakidvajuć toje, što ludzi pačali razychodzicca, kali Cichanoŭskuju zatrymali pa darozie ŭ Barysaŭ, ale heta poŭnaja chłuśnia. Naadvarot tolki padychodziła bolej i bolej. Nichto i nie dumaŭ iści dadomu.
Ludzi? Jany byli samyja roznyja. I rabočyja šmatlikich barysaŭskich zavodaŭ, i navučency miascovych PTV i technikumaŭ, i staryja intelihienty, była i «ołdskulnaja» apazicyja jak kolišni lidar «Zubra» Źmicier Barodka, jaki na sioletnich vybarach padtrymlivaje Siarhieja Čeračnia, maładyja baćki ź dziećmi, pryjechali ludzi z Žodzina, ź blizkich viosak.
Na placoŭcy hrała padkreślena biełaruskamoŭnaja muzyka: «Lapis», Lavon Volski, NIZKIZ. Zredku tolki jana raźbivałasia na DDT ci Coja. I bieł-čyrvona-biełych ściahoŭ u Barysavie na mitynhu było niamała: kala dziasiatku. Zasmučaje chiba tolki toje, što moža tolki pracentaŭ z 10 ludziej byli ŭ abarončych maskach. Zdajecca, ludzi ŭžo kančatkova rassłabilisia. Na pieršych mitynhach u padtrymku Cichanoŭskaj na Kamaroŭcy pracentaŭ 95 było jakraz u maskach.
Internet i mabilnaja suviaź u Barysavie pracavali kiepska. Dziva, kali na «Barysaŭ-Arenie» źbirajecca pad 15 tysiač hledačoŭ, to pierabojaŭ amal niama, a tut visić pry mienšaj kolkaści.
Vałanciory Cichanoŭskaj byli apranutyja ŭ biełyja maječki z emblemami serca, kułak i V (viktoryi). Viestka pra zatrymańnie kandydatki pa darozie pryjšła chutka, ale padałosia, što nichto nie chvalavaŭsia. Usie ciarpliva čakali. Milicyi, prynamsi, u formie zaŭvažna nie było zusim.
Kali kandydatka ŭsio ž pryjechała, to nad Barysavam zahučała «Śvieta, Śvieta». I heta, vidavočna, nie było padrychtavanym zahadzia, a pieršaje, što pryjšło na rozum ludziam. Takoje kranalnaje i naiŭnaje: «Śvieta, Śvieta».
Sama Cichanoŭskaja pakul što nie stadyjonny trybun, jana krychu niaŭpeŭnienaja, saromiejecca takoj papularnaści. Jana nie advažvajecca adychodzić ad napisanaha tekstu. Tolki adnojčy, kali ludzi z natoŭpu stali adžartoŭvacca na temu karanavirusa, to i sama Śviatłana stała im adkazvać.
Zrešty, zdajecca, ludziam i padabajecca, što Cichanoŭskaja zusim nie palityk, toje, što jana pazicyjanuje siabie jak «prostuju žančynu». Jana šmat ciśnie na sientymientalnaść. Naprykład, jak hulała z mužam pa Barysavie paru hadoŭ tamu, i tady dumać nie mahła, što stanie kandydatam, a Siarhiej budzie siadzieć u SIZA. «Ja tady była ščaślivaja. Ja i ciapier u niejkim sensie ščaślivaja, bo adčuvaju nadzieju».
Da čaho zaklikała Cichanoŭskaja? Nie chadzić na daterminovaje hałasavańnie, prychodzić na ŭčastki tolki ŭ dzień vybaraŭ, a ŭ vypadku falsifikacyj abaranić svaje hałasy. Jak mienavita abaraniać hałasy? Śviatłana nie kazała. Zatoje jana havaryła, što pry vialikaj jaŭcy sfalsifikavać vybary budzie ciažka.
«Mnie ŭłada nie patrebnaja, ja za sumlennyja vybary», — kazała kandydatka. «A ci budziecie vy pra ludziej kłapacicca?» — pačułasia z natoŭpu. «Tyja paŭhoda, jakija ja budu pry ŭładzie, abaviazkova budu», — skazała jana.
Padrychtavała kandydatka i paru słovaŭ pra Barysaŭ. «Barysaŭ pavinien stać pramysłovym honaram krainy», — kazała Cichanoŭskaja. Viadoma, jaje słovy sustrakali avacyjami.
Pradstaŭnica štaba Viktara Babaryki Maryja Kaleśnikava nadzvyčaj upeŭniena trymajecca na scenie, jana nibyta pryrodžanaja vystupać dla vialikaj kolkaści ludziej, artystyčnaje minułaje nikudy tak nie źnikaje.
Kaleśnikava źviartałasia da vajskoŭcaŭ, u Barysavie znachodzicca niekalki vajskovych čaściej, a taksama štab Paŭnočna-Zachodniaha apieratyŭnaha kamandavańnia. Jana kazała, što ŭłady nie pavažajuć siłavikoŭ, a novaja ŭłada budzie.
«Vy takija pryhožyja, nievierahodnyja», — kazała Kaleśnikava.
«My pavinny praciahnuć cisnuć uładu lubymi srodkami, — praciahvała pradstaŭnica Babaryki. — Kožnaje parušeńnie zakona pavinna być zafiksavana. Ciapier jak nikoli šmat jany pakidajuć śladoŭ».
Ahułam mitynh ciahnuŭsia kala hadziny. Sychodzili Cichanoŭskaja i Kaleśnikava pad usio toje ž «Śvieta, Śvieta», a taksama «Vierym. Možam. Pieramožam». Nazaŭtra ich čakajuć Hłybokaje, Navapołack i Viciebsk.
Prapahandysty zajavili pra razhrom sietki salidarnaści i aryšt jaje ŭdzielnikaŭ8
Kamientary