Zapłanavanaje na 18‑19 lipienia 2009 h. praviadzieńnie čarhovaha, V źjezda biełarusaŭ śvietu MHA «ZBS «Baćkaŭščyna» moža apynucca pad pahrozaj.
Mižnarodnaje hramadskaje abjadnańnie Zhurtavańnie biełarusaŭ śvietu «Baćkaŭščyna» atrymała čarhovuju admovu na praviadzieńnie źjezda biełarusaŭ śvietu.
Na hetym tydni admoviła administracyja DK Minskaha traktarnaha zavoda, a taksama 16 inšych załaŭ Minska.
Aficyjnaja pryčyna bolšaści admovaŭ — «ramontnyja raboty». U pryvatnaści, u lipieni buduć ramantavacca DK prafsajuzaŭ, KZ «Minsk», Pałac kultury MAZ, MTZ, aktavaja zała Linhvistyčnaha ŭniviersiteta, prablemy z pažarnaj biaśpiekaj maje Dom aficeraŭ.
Pry pieršym kantakcie z ŭsimi ŭstanovami zapyt MHA «ZBS «Baćkaŭščyna» ŭsprymaŭsia zacikaŭlena. Adnak užo praź niekalki tydniaŭ usie ŭstanovy admovili ŭ pradstaŭleńni arendy.
Na dumku kiraŭnictva arhanizacyi, ramontnaja epidemija, što zachlisnuła Minsk, demanstruje palityčnaje rašeńnie orhanaŭ ułady.I jano niedalnabačnaje, bo ciahnie za saboj praviadzieńnie źjezda albo na adnoj z płoščaŭ Minska, albo ŭ zamiežžy, dzie ŭ źjeździe narešcie voźmie ŭdzieł i palityčnaja emihracyja.
Admova ŭ praviadzieńni forumu ŭ stalicy mietrapolii niehatyŭna adabjecca na imidžy Biełarusi ŭ śviecie.
***
Źjezdy biełarusaŭ śvietu MHA ZBS «Baćkaŭščyna» źjaŭlajucca statutnym mierapryjemstvam Zhurtavańnia i sklikajucca raz na čatyry hady.Sioleta ŭ Źjeździe čakajecca ŭdzieł kiraŭnikoŭ i siabraŭ biełaruskich arhanizacyj zamiežža z bolš čym 20 krain śvietu, a taksama pradstaŭnikoŭ biełaruskaj tvorčaj intelihiencyi, palitykaŭ i hramadskich dziejačaŭ ź Biełarusi.
Asablivaściu źjezdaŭ MHA «ZBS «Baćkaŭščyna» źjaŭlajecca toje, što ŭ ich biaruć udzieł ludzi roznych palityčnych pohladaŭ, a na źjeździe akramia spravazdačaŭ i vybaraŭ abmiarkoŭvajucca važniejšyja pytańni ŭzajemadziejańnia mietrapolii i dyjaspary, hramadskaje i kulturnaje žyćcio Biełarusi.
Miž inšym, u «Baćkaŭščyny» nie było prablemaŭ z praviadzieńniem tolki Pieršaha źjezda biełarusaŭ śvietu (1993 h.).
U 1997 h. pytańnie z pamiaškańniem udałosia vyrašyć litaralna ŭviečary napiaredadni mierapryjemstva. U 2001 h. «Baćkaŭščynie» dali dazvoł na praviadzieńnie suśvietnaha forumu ŭ DK «Sukno», admoviŭšy va ŭsich załach u Minsku, ale litaralna za niekalki dzion haradskija ŭłady źmianili svajo rašeńnie i pradstavili pamiaškańnie pa vuł. Frunzie, 5 (były Dom litaratara). U 2005 h. byli doŭhija ŭzhadnieńni, u vyniku jakich usio ž taki było dadziena ŭ arendu pamiaškańnie Mižnarodnaha adukacyjnaha centru (IVV). Sioleta admoviła i IVV.