«Mašynu viarnuć, ściahi źniščyć». U Hrodnie asudzili Uładzimira Rodčanku

U sudzie Leninskaha rajona ŭ Hrodnie 29 lipienia prajšoŭ administracyjny praces u dačynieńni da Uładzimira Rodčanki za ŭdzieł 14 lipienia ŭ niesankcyjanavanym masavym mierapryjemstvie z dapamohaj aŭtamabila. Jaho pryznali vinavatym i dali štraf 25 bazavych vieličyń (675 rubloŭ), piša Hrodna.life.

Uviečary 14 lipienia ekipaž DAI spyniŭ Volkswagen Tiguan Uładzimira Rodčienki na Sacyjalistyčnaj vulicy. Hety aŭtamabil u horadzie viedajuć mnohija: jon rehularna padtrymlivaŭ akcyi salidarnaści ŭ Hrodnie ŭ červieni i lipieni 2020 hoda. Supracoŭniki inśpiekcyi zabrali aŭtamabil za hučnuju muzyku i bieł-čyrvona-bieły ściah na dachu.

U toj ža viečar u RAUS Leninskaha rajona na Uładzimira skłali pratakoł pa art. 23.34 KaAP (Parušeńnie paradku arhanizacyi abo praviadzieńnia masavych mierapryjemstvaŭ). Mašynu Uładzimira adahnali na stajanku milicejskaha ŭčastka jak rečavy dokaz.

Na sudzie śviedkami pa spravie vystupili supracoŭniki AMAPa: Siarhiej Saroka i Uładzimir Sakałoŭski. 14 lipienia jany nieśli słužbu ŭ rajonie Savieckaj płoščy. U toj viečar jany nikoha nie zatrymlivali i nie papiaredžvali ab niesankcyjanavanym mierapryjemstvie, u ich zadaču ŭvachodziła tolki patrulavańnie. Samoha Rodčanku jany nie bačyli, tolki jaho aŭtamabil. Milicyjanty patłumačyli ŭ sudzie, što mašyna Rodčanki niekalki razoŭ prajazdžała ŭ rajonie Savieckaj płoščy. Jak i inšyja kiroŭcy, Rodčanka padavaŭ sihnały. Paśla hetaha ludzi pačynali plaskać.

Na sudzie Rodčanka raspavioŭ, što svaimi dziejańniami jon vykazvaŭ hramadzianskuju pazicyju, ale zakon nie parušaŭ. Na videa, pradstaŭlenym RAUS Leninskaha rajona, nie vidać, kab aŭtamabil hrodzienca padavaŭ sihnały.

«Majho kandydata nie zarehistravali i niezakonna pasadzili. Tak, u toj viečar ja jeździŭ sa ściahami i muzykaj, ale ja nie parušaŭ PDR, nie stvaraŭ avaryjnuju situacyju i nie sihnaliŭ. Ja zakonapasłuchmiany hramadzianin. Kali mianie spynili supracoŭniki DAI, ja byŭ vietlivy i kulturny. Ale ŭ mianie čamuści zabrali aŭtamabil. Prašu sud vydać nieadkładna mnie moj transpartny srodak. Siamja znachodzicca na samaizalacyi za horadam, i mnie patrebny aŭtamabil», — skazaŭ na sudzie Rodčanka.

Pavialičyć

Sudździa Rusłan Huryn pryznaŭ Uładzimira Rodčanku vinavatym va ŭdziele ŭ niesankcyjanavanym mierapryjemstvie i asudziŭ jaho na štraf 25 bazavych vieličyń (675 rubloŭ). Sudździa vyrašyŭ viarnuć mašynu Rodčanku, a dva bieł-čyrvona-biełyja ściahi, źniatyja z aŭto, źniščyć.

Rodčanka maje namier asprečvać rašeńnie suda.

• 0
• 0
• 0
• 0
• 0