Što ŭčora adbyvałasia pa ŭsim Minsku? Chronika pratestaŭ FOTA, VIDEA
Učora ŭ Minsku praciahnulisia mirnyja pratesty, łakalizavalisia jany spantanna ŭ roznych mikrarajonach Minska, hałoŭnym čynam u Sierabrancy i na Kamiennaj Horcy, va Uruččy.
Uvieś dzień ludzi nieśli na Puškinskuju kvietki: tut, pa paviedamleńniach MUS, viečaram 10 žniŭnia zahinuŭ adzin z pratestoŭcaŭ. Siońnia, 12 žniŭnia, usie kvietki prybrali.
Dniom prychodzili paviedamleńni, što kala epicentraŭ demanstracyj u Minsku ŭčora vystaŭlenyja paddony z tratuarnaj plitkaj. Vialikuju jaje kolkaść zaŭvažyli kala Makdonaldsa na płoščy Banhałor, niekalki paddonaŭ stajała ŭ rajonie ŭniviersama «Ryha». Choć tratuar u tych miescach ramontu nie patrabuje. Taksama tam dniom pryparkavali dziŭnuju mašynu ź niejkimi nidzie raniej nie bačanymi nalepkami «Za baćku 100%». Prosta pobač z kantejnieram z kamieńniem i inšym śmiećciem.
U rajonie Prytyckaha na prypynku, paviedamili čytačy NN, u zaŭvažnym miescy z tratuara źniali plitku. Heta mahło być zroblena ŭ pravakacyjnych metach, kab spravakavać demanstrantaŭ na siłavyja dziejańni.
Z 18-j pa ŭsioj krainie pačalisia prablemy ź internetam.
Dalej pa ŭsim horadzie pačalisia masavyja previentyŭnyja zatrymańni: i kala mietro Puškinskaja, choć demanstranty tam amal nie kancentravalisia, i na praśpiekcie Dziaržynskaha kala zubra, i ŭ Sierabrancy.
Zatrymańnie 15-hadovaha junaka trapiła na videa. U rukach siłavika — hranata.
Adznačyŭsia ŭčorašni dzień i žorstkim abychodžańniem z žurnalistami. Siniaja forma, čornaja kamizelka — siłavik napaŭ na žurnalistaŭ kala hatela «Arbita». Jon udaryŭ pa kamiery fotakara ahienctva Asašyejted pres Siarhieja Hryca, zabraŭ fłeš-kartu ŭ fotakara Našaj Nivy Nadziei Bužan. «U*byvaj, a to kamieru razabju», — kryčaŭ jon Hrycu.
Paciarpieŭ videaapieratar TUT.BY Usievaład Zarubin, jaho ŭdaryli pa nazie. Siłaviki raźbili ekran kamiery i zabrali rabočuju fłešku ź videa. U fatohrafa TUT.BY Vadzima Zamiroŭskaha sarvali bejdž i taksama zabrali fłešku. Fłeški z pracoŭnymi materyjałami taksama zabrali ŭ fatohrafaŭ TUT.BY Darji Burakinaj.
Demanstrantaŭ kala mietro Spartyŭnaja abrali ŭčora takuju taktyku: jak tolki nabližajecca AMAP, jany raźbiahajucca ŭ roznyja baki, sprabujuć pratestavać i pry hetym nie naryvacca na zatrymańni.
U 21.30 amapaŭcy rasstralali humovymi kulami demanstrantaŭ, jakija stajali na skryžavańni Prytyckaha — Žudro. Byŭ praciahły abstreł.
Toje, što adbyvajecca ŭ Biełarusi ciapier, heta ŭžo nie pratesty. Heta masavaja narodnaja mabilizacyja, jakaja raspaŭsiudziłasia na ŭsiu krainu. Dva miesiacy tamu my žyli ŭ adnoj Biełarusi, a ciapier žyviom u druhoj. Praciŭniki Łukašenki pabačyli, što jany nie prosta ŭ bolšaści, a ŭ vialikich haradach — u absalutnaj bolšaści. Ułady mohuć zadušyć vuličnyja pratesty — ale dalej im daviadziecca žyć z hramadstvam, jakoje zrazumieła, što jany ŭ bolšaści.
U Labiažym ludzi vyjšli ŭ dvary i zaklikali susiedziaŭ vychodzić da ich taksama.
Masavyja, masavyja zatrymańni byli ŭčora ŭ minskaj Sierabrancy. AMAP chadziŭ minimum u try ataki, karespandent Našaj Nivy naziraŭ, jak amapaŭcy ŭryvajucca ŭ padjezdy, dzie chavajucca demanstranty i pračesvajuć ich. Sierabranka ŭčora była arenaj masavych narodnych hulańniaŭ, ale ŭłady adkazali znoŭ siłaj.
Kala 50 čałaviek tut sprabavali pastavić barykadu sa śmietnic. Siłaviki ŭziali jaje prykładna za piać chvilin. Paśla dadatkova pryjechali jašče čatyry «Tyhry», pastajali kala rynku. Chłopcy pačali znoŭ vystaŭlać śmietnicy. Tady vybiehli amapaŭcy z cyvilnych mašyn i pačali ich dubasić. Pryjechali dźvie chutkija i reanimacyja — ale jany, zdajecca, nie spatrebilisia, pastajali i pajechali. Zatoje pryjechali jašče 2 aŭtazaki i 6 aŭtobusaŭ z amapaŭcami. Amapaŭcy raźbiehlisia pa dvarach pračesvać ich u pošukach demanstrantaŭ. Takim čynam, paśla taho jak davoli šmatlikija mirnyja hulańni ludziej u Sierabrancy razahnali hranatami, tut užo voś 4 hadziny niešmatlikija pratestoŭcy hrajucca ŭ koški-myški z AMAPam. Zatrymanych było šmat. Ciažka navat acanić kolkaść — usio heta naziraŭ karespandent Našaj Nivy.
AMAP kryšyć aŭtamabili na vulicach, achoplenych pratestami — mnostva vypadkaŭ učora i siońnia trapili na fota i videa, što cyrkulujuć u Telehramie. Padychodziać i bjuć škło, fary dubinkami, adbivajuć lusterki. Realna najhoršaje, što možna było prydumać — ujaŭlajecie azłableńnie siamji, jakoj raskuročyli aŭtamabil, časta adziny karmilec u siamji. Horšaj idei dla taho, kab vyvieści nasille na novy vitok, prydumać niemahčyma. Ciažka pavieryć, što amapaŭcy mohuć rabić takoje spantanna. Ideja, musić, zaklučajecca ŭ tym, kab zastrašyć ludziej ad vyjezdu ŭ horad u čas pratestaŭ. Ale ludzi buduć vykazvać svajo staŭleńnie, naprykład, pa darozie z pracy i na pracu. Katastrafičnaja, prosta katastrafičnaja taktyka siłavikoŭ, jakaja pryviadzie da dzikaha azłableńnia. Nasille sparadžaje nasille. Prosta katastrafičnaja taktyka nasilla z boku ŭładaŭ.
U Minsku taksama palavali na matacyklistaŭ. Infarmacyja pra źbićcio i zatrymańnie matacyklistaŭ prychodziła z roznych punktaŭ Minska.
Bondarava abrynułasia na muziej Janki Kupały i mastaka Sušu31
Kamientary