U Maładziečnie vychavalnica začyniła 3-hadovaje dzicia ŭ prybiralni, bo jano kryčała «Łukašenku ŭ aŭtazak»

Incydent adbyŭsia 25 žniŭnia ŭ dziciačym sadku №27 u Maładziečnie. Pra heta «Naša Nivie» raskazała Rada Rohava, maci maleńkaha Lošy.

Loša — samaje małodšaje dzicia ŭ vialikaj siamji Rohavych. Rada vychavała piaciarych svaich dziaciej i dvaich pryjomnych, maje orden Maci. Ale jana i ŭjavić sabie nie mahła, što daviadziecca adstojvać svajo dzicia pierad vychavalnicami sadka — tyja začynili jaho ŭ prybiralni.

Pavialičyć

«25 žniŭnia muž zabiraŭ Lošu z sadka, patelefanavaŭ mnie i skazaŭ, što zdaryłasia nadzvyčajnaja situacyja. Syn u ślazach raspavioŭ pra toje, što ŭ hrupie kryčaŭ «Łukašenku ŭ aŭtazak». Za heta vychavalnica razzłavałasia i začyniła jaho ŭ prybiralni. Loša kaža, što prasiadzieŭ tam amal uvieś son», — raskazvaje Rada. 

Žančyna raskazvaje, što syn moh pačuć hety vyraz i pa televizary, i na płoščy ŭ Maładziečnie 9 žniŭnia. 

«My hulali ź dziećmi ŭviečary na płoščy, i ja — ščyra vam pryznajusia — padumała, što zdymajuć film. Pasiarod płoščy stajali ludzi na kaleniach pierad AMAPam. Ja nie adrazu zrazumieła, što heta moža adbyvałasia nasamreč. Mahčyma, tady syn padchapiŭ hety vyraz», — tłumačyć žančyna. 

Rada raskazvaje, što naŭmysna nie zabaraniała dziciaci heta vymaŭlać, bo bajałasia, što syn budzie pramaŭlać słovy śpiecyjalna, kali na hetym akcentavać uvahu. 

«Lošu tolki ŭ listapadzie spoŭnicca čatyry hodziki. Jak moža dzicia zrazumieć, za što jaho pakarali? Ciapier dzicia płača, admaŭlajecca iści ŭ sadok, baicca, što znoŭ začyniać u prybiralni», — raskazvaje maci. 

Paśla taho, što zdaryłasia, Rada źviarnułasia da zahadčycy sadka Aleny Drahun. 

«Viedajecie, što jana mnie skazała? Davajcie praviadziom vočnuju staŭku vašaha syna i vychavalnicy. Zahadčyca stała kazać pra toje, što Loša ŭ mianie fantazior, što takoha nie było i što ŭ prybiralni jaho nichto nie začyniaŭ. Maŭlaŭ, jon sam zastaŭsia tam, a vychavalnica prosta pryčyniła dźviery na chvilinu, — kaža Rada. — Ale jany nie ŭličyli, što pierad tym, jak zaprasić mianie ŭ kabiniet, hučna railisia pamiž saboj ab tym, što ŭsio buduć admaŭlać».

27 žniŭnia Alena Drahun sabrała baćkoŭski schod pa prośbie baćkoŭ, aburanych takimi pavodzinami piedahohaŭ. U hrupie, kudy chodzić syn Rady, pracujuć try vychavalnicy. Chto ź ich začyniŭ syna ŭ prybiralni, Rada dakładna nie viedaje, ale spadziajecca, što sama vychavalnica patłumačyć svaje pavodziny pierad baćkami. 

Zahadčyca sadka kamientavać situacyju admoviłasia. 

«Mnie treba čas razabracca. Zvanicie nie raniej za paniadziełak», — skazała Alena Drahun. 

• 0
• 0
• 0
• 0
• 0
• 0
• 0
• 0