U Breście zvolniłasia dyrektarka škoły, dzie na ŭčastku pieramahła Cichanoŭskaja
Dyrektarka bresckaj škoły-sada №10 Alena Buhłajeva napisała zajavu na zvalnieńnie. U baćkoŭskich čatach stali pisać, što jaje vymusili zvolnicca za sumlenny padlik hałasoŭ, piša «Jeŭraradyjo».
«Jeŭraradyjo» datelefanavałasia da Aleny Buhłajevaj. Jana admoviłasia raskryvać padrabiaznaści, ale paćvierdziła, što zvalniajecca. I dadała, što razam ź joj sa škoły-sada sychodziać dźvie jaje namieśnicy.
— Namieśnic zvolniła ja. Jany zvalniajucca sa mnoj z salidarnaści, — adkazvaje eks-dyrektarka. — Pryčyna — maja hramadzianskaja pazicyja. Ja pracuju sumlenna, dzie b ja ni pracavała. Voś moj adkaz.
Na prezidenckich vybarach Buhłajeva była staršynioj kamisii na ŭčastku №87, jaki raźmiaščaŭsia jakraz u škole-sadzie №10. Miarkujučy pa pratakole, vyviešanym u dzień hałasavańnia, upeŭnienuju pieramohu tut atrymała kandydatka ŭ prezidenty Śviatłana Cichanoŭskaja. Jana nabrała ŭ 2,3 raza bolš hałasoŭ, čym jaje asnoŭny sapiernik Alaksandr Łukašenka — 1155 suprać 499.
— Pa słovach dyrektarki, jaje vyklikali na razmovu, paśla jakoj jana sama napisała zajavu. Taksama bolš niama ŭ nas namieśnicy dyrektara pa vučebnaj rabocie i namieśnicy dyrektara pa haspadarčaj častcy. Siońnia jany z nami raźvitalisia, — raskazała «Jeŭraradyjo» adna z supracoŭnic škoły-sada.
Razam z dyrektarkaj škoły taksama vyrašyli zvolnicca namieśnica dyrektara pa vučebnaj rabocie Ludmiła Marčuk i namieśnica dyrektara pa haspadarčaj rabocie Žanna Zalubič. Marčuk na vybarach była sakratarom UVK na tym ža ŭčastku, što i Alena Buhajeva.
Ciapier čytajuć
Chto taki Maćviej Bialaj, jakoha nibyta departavali ŭ Biełaruś? Raskazvajem historyju dziŭnaha aktyvista z padazronym minułym1
Kamientary