Smarhonskaha aktyvista, jaki adsiedzieŭ siem sutak za chulihanstva, całkam apraŭdali. Jon budzie patrabavać kampiensacyi
10 vieraśnia ŭ Smarhonskim rajonnym sudzie razhladali spravu aktyvista Alaksandra Papłaŭskaha. U vyniku smarhonca, jaki ŭžo adsiedzieŭ pa artykule za drobnaje chulihanstva siem sutak, całkam apraŭdali, piša «Rehijanalnaja hazieta».
Nahadajem, što 5 žniŭnia na vybarčy ŭčastak №16 u Smarhoni pryjšoŭ haradžanin Alaksandr Papłaŭski. Jon chacieŭ sfatahrafavać vyniki daterminovaha hałasavańnia za hety dzień.
Padčas fatahrafavańnia ŭ Papłaŭskaha zdaryŭsia kanflikt sa staršynioj kamisii Alenaj Atcieckaj. Heta trapiła na videa, jakoje zdymaŭ sam Papłaŭski.
Paśla staršynia Atcieckaja napisała zajavu na Papłaŭskaha, jaki nibyta zaminaŭ pracy vybarčaj kamisii. 7 žniŭnia Alaksandra Papłaŭskaha asudzili za drobnaje chulihanstva (artykuł 17.1 Kodeksa ab administracyjnych parušeńniach). Alaksandru dali 7 sutak. Staršynioj suda była Ludmiła Piatrova.
Aktyvist nie pahadziŭsia z abvinavačvańniem i abskardziŭ rašeńnie rajonnaha suda Smarhoni ŭ Hrodzienskim abłasnym sudzie.
U vyniku pastanovaj abłasnoha suda ad 24 žniŭnia pastanovu Smarhonskaha suda admianili i spravu nakiravali na razhlad novamu smarhonskamu sudździ — Dźmitryju Damaradu.
Pa chadatajnictvie Alaksandra Papłaŭskaha Damarad pravodziŭ sudovaje pasiadžeńnie pa-biełarusku.
Sud 10 vieraśnia ciahnuŭsia kala šaści hadzin.
U vyniku sudździa pryjšoŭ da vysnovy, što spravu treba spynić pa pryčynie adsutnaści ŭ dziejańniach Alaksandra Papłaŭskaha składu administracyjnaha pravaparušeńnia.
Pastanova suda pakul nie ŭstupiła ŭ siłu.
— Kaniešnie, ja zadavoleny zychodam suda. A za siem sutak, jakija musiŭ adsiedzieć, budu patrabavać kampiensacyju, — paviedamiŭ Alaksandr karespandentu «Rehijanalnaj haziety».
Ciapier čytajuć
«Byŭ hałodny, jak z Aśviencima, nie jeŭ ni miasa, ni harodniny». Što viadoma pra śmierć babrujskaha žurnalista, na jakoha zaviali kryminalnuju spravu ŭ Polščy1616
Kamientary