Jak paviedamlaje Bloomberg, pryvatnaja technałahičnaja kampanija Sandvine Inc. prademanstravała svajo abstalavańnie ŭradavaj słužbie biaśpieki ŭ Biełarusi ŭ mai. Zhodna z dakumientami, abstalavańnie Sandvine vykarystoŭvajecca dla kiravańnia i abarony sietak, a jaho funkcyja błakiroŭki veb-sajtaŭ moža abmiežavać karystalnikam dostup da kantentu, jaki parušaje zakon: terarystyčnaj prapahandy abo dziciačaj parnahrafii.
Padčas akcyi salidarnaści z Maryjaj Kaleśnikavaj u Minsku cichar vyryvaje telefon u demanstrantki, jakaja fiksavała na kamieru toje, što adbyvajecca. Fota Nadziei Bužan
Adnak u Biełarusi ŭ žniŭni abstalavańnie Sandvine «deep packet inspection» vykarystoŭvali dla cenzury sacyjalnych sietak, navinavych sajtaŭ i płatformaŭ abmienu paviedamleńniami, jakimi karystajucca pratestoŭcy, što vystupajuć suprać falsifikacyi vybaraŭ.
Znajomyja sa spravami Sandvine krynicy Bloomberg zajaŭlajuć, što pradstaŭniki kampanii sustrakalisia niepasredna z aficyjnymi asobami ŭ Biełarusi, a zatym adhružali abstalavańnie praz padradčyka dla ŭstanoŭki ŭ data-centrach u Minsku.
Sienatar ZŠA Dzik Durbin zaklikaŭ Minfin pravieści rasśledavańnie ŭ dačynieńni da kampanii Sandvine u suviazi z mahčymymi parušeńniami sankcyj ZŠA ŭ dačynieńni da Biełarusi. Na praciahu bolš čym dziesiaci hadoŭ hetyja sankcyi ŭvodzili abmiežavańni na pradastaŭleńnie amierykanskimi kampanijami srodkaŭ, tavaraŭ abo pasłuh, jakija prynosiać karyść Łukašenku ci inšym asobam, jakija ŭdzielničajuć u «dziejańniach abo palitycy, što padryvajuć demakratyčnyja pracesy abo instytuty».
Padčas telefonnaj kanfierencyi Sandvine, nakiravanaj na vyrašeńnie prablem supracoŭnikaŭ adnosna pracy ŭ Biełarusi, kiraŭniki zajavili, što jany supracoŭničajuć z uradavaj arhanizacyjaj u krainie ŭžo bolš za hod. Sandvine dała Biełarusi technałohiju, jakaja filtruje kala 40% usiaho internet-trafiku, zajavili kiraŭniki kampanii. Jany ličać, što heta nie parušaje amierykanskich sankcyj. Zapis razmovy byŭ pieradadzieny ahienctvu Bloomberg.
Alaksandr Chavanh, hałoŭny techničny dyrektar Sandvine, pryznaŭ padčas razmovy, što Biełaruś moža vykarystoŭvać abstalavańnie kampanii dla błakavańnia veb-sajtaŭ i dadatkaŭ abmienu paviedamleńniami, ale jon skazaŭ, što Sandvine pryjšoŭ da vysnovy, što internet i dostup da kankretnych materyjałaŭ na veb-sajtach nie źjaŭlajucca «častkaj pravoŭ čałavieka».
