U Hrodnie na Marš hierojaŭ pryjšło 3—5 tysiač čałaviek. Pratest skončyŭsia žorstkimi zatrymańniami, piša Svaboda.
Pratestoŭcy ź bieł-čyrvona-biełymi ściahami sabralisia na Savieckaj vulicy kala moładzievaha centre «Hrodna» kala 14:00. Jany stali ŭ vialikaje koła i skandavali: «Vierym, možam, pieramožam», «Žyvie Biełaruś», «Heta naš horad», «Horadnia, vychodź». Niekatoryja pryjšli na marš z sabačkami, kvietkami, plakatami, u adzieńni biełaha i čyrvonaha koleraŭ.
Adtul kalona rušyła ŭ bok vulicy Horkaha praź Vialikuju Trajeckuju vulicu. Na jaje čale išli ludzi ŭ pracoŭnaj formie pradpryjemstva «Chimvałakno», mužčyna z abrazom Maci Božaj. Aŭtamabili spynilisia i prapuskali pratestoŭcaŭ, pakul tyja pierachodzili praz darohu. Aŭtamabilny ruch na Vialikaj Trajeckaj na peŭny čas spyniŭsia. Kiroŭcy syhnalili pratestoŭcam, u tym liku z mašyn chutkaj dapamohi.
Kalona dajšła da Hrandzickaha rynku, jaje hałava pierajšła praz darohu i paviarnułasia iści ŭ centar. Da stadyjonu «Nioman» padjechali aŭtazaki. Kab u ich nia trapić, demanstranty pierabiehli na druhi bok vulicy.
Urešcie aŭtazaki padjechali da abodvuch bakoŭ vulicy Horkaha. Vyjšła kala sotni amapaŭcaŭ, milicyjantaŭ, vajskovych specnazaŭcaŭ, mnohija ŭ šlemach, sa zbrojaj, jakaja stralaje humovymi kulami. U peŭny momant vyjšła kalona vajskoŭcaŭ i, rytmična bjučy ŭ ščyty, pajšła ŭ bok pratestoŭcaŭ.
Spačatku zatrymlivali ludziej u chvaście kalony. Kali tyja syšli ŭ dvary, ich žorstka vychoplivali adtul. Pavodle infarmacyi Andreja Mialeški, zatrymali nie mienš za 102 čałavieki, dakładnaja ličba nieviadomaja.
Zatrymanych pavieźli ŭ Leninski RAUS. Da rajadździełu milicyi ŭ hety čas pryjaždžała chutkaja dapamoha. Blizkija zatrymanych raskazali, što čuli, jak tyja ŭ budynku RAUS śpiavali i spračalisia ź milicyjantami.
