Śviatłana Cichanoŭskaja ŭ piatnicu, 18 vieraśnia, vystupiła pierad Savietam pa pravach čałavieka AAN pa videasuviazi. U svajoj pramovie jana zapatrabavała nieadkładnaha mižnarodnaha ŭmiašańnia ŭ situacyju ŭ Biełarusi paśla prezidenckich vybaraŭ u krainie. Jana zajaviła, što mirnych pratestoŭcaŭ «zatrymlivali, źbivali, hvałtavali, niekatoryja z pratestoŭcaŭ pamierli».
U adkaz pastajanny pradstaŭnik Biełarusi pry Adździaleńni AAN u Ženievie Juryj Ambrazievič zapatrabavaŭ prypynić jaje vystup. Dla hetaha jon źviarnuŭsia da maderatara dyskusii, zajaviŭšy, što vystup «asobna ŭziatych hramadzian Respubliki Biełaruś nie moža razhladacca prymalnym». Jahonuju prośbu prypynić vystup Cichanoŭskaj padtrymali Rasija, Vieniesueła i Kitaj. Ale heta nie dapamahło: Śviatłana Cichanoŭskaja pradoŭžyła svaju pramovu.
Voś jak hety kanfliktny momant apisaŭ režysior Svabodnaha teatra Mikałaj Chalezin, jaki naziraŭ za pasiadžeńniem:
«Praktyčna adrazu paśla tyrad pradstaŭnikoŭ Biełarusi i Rasii staršynia dała słova Śviatłanie Cichanoŭskaj z uklučeńniem videazapisu jaje vystupleńnia. Ale praz 15 siekund videa pierapyniłasia, pakolki pradstaŭnik Biełarusi Juryj Ambrazievič i pradstaŭnik Rasii pačali stukać svaimi kartkami z ukazańniem krain pa mikrafonach, kab vystupu Cichanoŭskaj nie było čuvać. Paśla taho, jak vystup pierapyniŭsia dvojčy, słova pa čarzie ŭziali pradstaŭniki Hiermanii, Hałandyi i Danii, vykazaŭšy ahulnaje ździŭleńnie chamskimi pavodzinami pradstaŭnikoŭ Biełarusi i Rasii. Ścieny budynkaŭ AAN bačyli šmat momantaŭ nieprystojnych pavodzin roznych pradstaŭnikoŭ, ale hetyja pavodziny dypłamataŭ pa stupieni biestaktoŭnaści znachodziłasia blizka da samaj viaršyni śpisu».
Pa vynikach ekstrannych debataŭ była pryniataja rezalucyja, u jakoj havorycca, što «SPČ vykazvaje surjoznuju zakłapočanaść u suviazi z vartymi davieru śćvierdžańniami ab tym, što napiaredadni prezidenckich vybaraŭ 2020 hoda i paśla ich u Biełarusi byli ździejśnienyja parušeńni pravoŭ čałavieka, u tym liku šmatlikija akty katavańniaŭ, hvałtoŭnyja źniknieńni, vykradańni i advolnyja vydvareńni [z krainy], advolnyja zatrymańni, u tym liku niepaŭnaletnich, akty seksualnaha i hiendarnaha hvałtu, akty advolnaha pazbaŭleńnia žyćcia, napadu na členaŭ palityčnaj apazicyi, uklučajučy členaŭ Kaardynacyjnaj rady, ich zapałochvańnie i zaklučeńnie pad vartu».
