U Maskvie raskrytykavali namier Jeŭrasajuza zaprasić u Brusiel na pasiadžeńnie kiraŭnikoŭ MZS krain Jeŭracajuza 21 vieraśnia «dla znosin» eks-kandydata ŭ prezidenty Biełarusi Śviatłanu Cichanoŭskuju. Na hetym pasiadžeńni taksama moža vyrašycca pytańnie z nahody sankcyj u dačynieńni da biełaruskich uładaŭ. Pra heta zajaviła aficyjny pradstaŭnik MZS Rasii Maryja Zacharava.
— Naša pazicyja ŭ dačynieńni da ŭžyvanaha Jeŭrasajuzam sankcyjnaha instrumientaryja dobra viadomaja. Jon nielehitymny z punktu hledžańnia mižnarodnaha prava, ujaŭlaje saboj niedapuščalnaje ŭmiašańnie va ŭnutranyja spravy. A ŭ kantekście situacyi ŭ Biełarusi supiarečyć mecie adnaŭleńnia stabilnaści, naładžvańniu dyjałohu, zapusku kanstytucyjnaha pracesu, pasłableńniu napružanaści, pra što tak šmat kazali pradstaŭniki ES. Vidavočnyja sproby «razhojdvać łodku», i ŭ Bruseli nie pavinny dzivicca tamu, što miery ŭ adkaz buduć zroblenyja, — zajaviła Maryja Zacharava.
Jana ličyć, što ŭdzieł Śviatłany Cichanoŭskaj u pasiadžeńni — «jašče adno śviedčańnie adychodu Jeŭrasajuza ad raniej zroblenych zajaŭ ab adsutnaści hieapalityki ŭ situacyi ź Biełaruśsiu». Na jaje dumku, heta paćviardžaje i zajava Vysokaha pradstaŭnika ES pa zamiežnych spravach i palitycy biaśpieki Žozepa Barela ab niepryznańni Alaksandra Łukašenki ŭ jakaści abranaha prezidenta Biełarusi.
— Zalacańni jesaŭskich minzamspraŭ z samapryznačanym pradstaŭnikom biełaruskaj apazicyi i zaprašeńnie jaje ŭ Brusel «dla znosin» — składovaja častka scenara ŭmiašańnia va ŭnutranyja spravy Biełarusi. Heta pramoje parušeńnie asnovatvornych normaŭ Statuta AAN i pryncypaŭ chielsinkskaha Zaklučnaha akta ABSIE, jubilei jakich mižnarodnaja supolnaść adznačaje ŭ hetym hodzie. Prykryvajučysia ŭjaŭnym kłopatam pra hramadzianaŭ Biełarusi, Jeŭrasajuz, pa sutnaści, sam sprabuje vyrašać za ich, jak im žyć. Jašče raz adznačym, što pra kanstytucyjnuju reformu, jakaja zaklikanaja spryjać naładžvańniu ŭ hetaj krainie ahulnanacyjanalnaha dyjałohu, u ES ličać za lepšaje nie havaryć, — zajaviła aficyjny pradstaŭnik MZS Rasii.
Zacharava zaklikała Jeŭrasajuz pierahledzieć dadzieny kurs, jaki viadzie da erozii mižnarodna-pravavoha padmurka śvietaparadku, a ŭ vypadku ź Biełaruśsiu — pieraškadžaje narmalizacyi ŭ krainie.
