ŚMI apublikavali źviestki finraźviedki ZŠA ab rachunkach aliharchaŭ z atačeńnia Pucina ŭ amierykanskich bankach
Mižnarodny rasśledavalny prajekt žurnalistaŭ «Kasandra», jakim zajmajucca 110 miedyja z 88 krain, u tym liku ICIJ, BuzzFeed, OCCRP, apublikavaŭ vyniki vyvučeńnia sakretnych dakumientaŭ finansavaj raźviedki ZŠA (FinCEN), piša rbc.ru.
U śpisie finansavych apieracyj, jakija pryciahnuli ŭvahu FinCEN, apynulisia tyja, u jakich, pavodle źviestak ustanovy, fihurujuć rasijanie. Siarod ich ICIJ nazyvaje pradprymalnikaŭ Aleha Dzierypasku, Arkadzia i Barysa Ratenbierhaŭ, eks-kiraŭnika administracyi Barysa Jelcyna i daradcu prezidenta Valancina Jumašava, a taksama vijałančelista i blizkaha znajomaha Uładzimira Pucina Siarhieja Rałduhina.
Jak śćviardžajuć žurnalisty, jakija vyvučyli dakumienty, u kastryčniku 2010 źviazanaja z Rałduhinym kampanija Sandalwood Continental atrymała $830 tys. dalaraŭ ad kiprskaj Dulston Ventures. U pryznačeńni płaciažu pakazvałasia, što heta płata za praciah damovy pazyki. Dulston Ventures značycca ŭ śpisie afilavanych asob niekalkich rasijskich kampanij, jakija ŭvachodziać u «Sievierhrupp» Alaksieja Mardašova.
Daradca prezidenta na hramadskich pačatkach Valancin Jumašaŭ, jak śćviardžajuć žurnalisty, atrymaŭ $6 młn ad kampanii Epion Holdings Limited z Brytanskich Virhinskich vyspaŭ. Hetaja kampanija, zhodna sa źviestkami daśledčykaŭ, naležyć miljarderu Ališeru Usmanavu.
Braty Ratenberhi, jak adznačaje «Bi-bi-si», što ŭdzielničaje ŭ rasśledavańni, niahledziačy na sankcyi, pravodzili mižnarodnyja raźliki praz łondanski bank Barclays. Tak, da prykładu, Arkadź Ratenberh zdoleŭ pieravieści $7,5 młn pry kupli karciny Rene Mahryta La Poitrine. Na heta ŭžo źviartali ŭvahu ŭ Sienacie ZŠA, pradstaŭnik biznesoŭca tady zajaviŭ, što ździełka była zakonnaja.
Pavodle źviestak FinCEN, amierykanskaja chołdynhavaja kampanija Bank of New York Mellon pieraviała z 1997 pa 2016 tranzakcyj na sumu bolš za $1,3 młrd, «źviazanych z Aleham Dzierypaskam». Praz Deutsche Bank, śćviardžajuć śledčyja, u pieryjad z 2003 pa 2017 hod było ździejśniena jašče bolš tranzakcyj u intaresach Dzierypaski — na sumu ŭ $11 młrd.
Baza źviestak ICIJ, składzienaja sa spravazdač FinCEN, źmiaščaje infarmacyju ab 3810 patencyjna padazronych tranzakcyj, u jakich udzielničali rasijskija banki. U hetych tranzakcyjach rasijskija banki atrymali $7,28 młrd, a adpravili $3,50 młrd. Samym aktyŭnym zamiežnym kontrahientam rasijskich bankaŭ byŭ Bank of New York Mellon (2992 tranzakcyi).
Kamientary