sb.by
Pracu nad niekatorymi darožnymi kartami Biełarusi i Rasii pa intehracyi ŭ Sajuznaj dziaržavie prapanavali aktyvizavać, paviedamiŭ dziaržaŭny sakratar Sajuznaj dziaržavy Ryhor Rapota ŭ intervju prahramie «Hałoŭny efir» na telekanale «Biełaruś 1», piša «Źviazda».
«Paśla taho jak darožnyja karty byli padrychtavanyja, utvaryłasia niejkaja paŭza ŭ siłu roznych abstavinaŭ. Ciapier pa niekatorych darožnych kartach (pakolki rašeńnie nie pryniata, ja ich nie nazyvaju) prapanavali aktyvizavać dziejnaść. U hetym miesiacy budzie pasiadžeńnie hrupy vysokaha ŭzroŭniu, i, mahčyma, jana nadaść dadatkovy impuls rabocie nad hetymi darožnymi kartami», — skazaŭ Ryhor Rapota.
Na jaho dumku, usie darožnyja karty nakiravany na palapšeńnie ŭmoŭ dla rasijan i biełarusaŭ u roznych halinach — miedycynskim zabieśpiačeńni, strachavańni, padatkaabkładańni.
Havoračy ab kampiensacyi Biełarusi ŭ suviazi z padatkovym manieŭram u naftavaj halinie RF, Ryhor Rapota adznačyŭ, što hetaje pytańnie abmiarkoŭvajecca na mižviedamasnym, mižuradavym uzroŭni.
«Na placoŭku Sajuznaj dziaržavy pakul hetaje pytańnie nie vyniesiena. Ale, mabyć, budzie vyniesiena, pakolki ŭžo ciapier prapanavana razhledzieć pytańnie ab harmanizacyi padatkovaha zakanadaŭstva. Heta adzin sa składnikaŭ dadzienaha pytańnia, bo padatkovy manieŭr — heta pierš za ŭsio padatkovaje zakanadaŭstva ŭ pryviazcy da niejkich pytańniach enierhazabieśpiačeńnia Respubliki Biełaruś i cenavych paramietrach na enierhanośbity», — rastłumačyŭ dziaržsakratar SD.
Jon ličyć, što ruch u pytańni padatkovaha manieŭru jość. «Nakolki jon budzie chutkim i daść vyniki, mnie zaraz skazać ciažka. Ale ruch pačaŭsia, i, mnie zdajecca, dasiahnuta niejkaje parazumieńnie, jak ruchacca dalej. Vyrašać hetuju prablemu ŭ lubym razie daviadziecca, heta razumieńnie jość i prymušaje abodva baki pracavać», — reziumavaŭ Ryhor Rapota.
Kamientary