Litva, Polšča i Rumynija zaklikali ES pašyryć dapamohu dla novaj Biełarusi i ŭvieści biaźviz dla biełarusaŭ
Prezidenty Litvy, Polščy i Rumynii Hitanas Naŭsieda, Andžej Duda i Kłaus Jahanis zaklikajuć instytuty Jeŭrapiejskaha sajuza i dziaržavy-ŭdzielnicy razhledzieć pakiet zachadaŭ dapamohi demakratyčnaj Biełarusi, jakaja imkniecca da palityčnych, ekanamičnych i sacyjalnych pieraŭtvareńniaŭ, piša «Svaboda».
Lidary troch krain zaklikali Jeŭrasajuz raspracavać pakiet dapamohi, jaki b uklučaŭ handal ź ES, dapamohu ŭ pieramovach ab ustupleńni ŭ Suśvietnuju handlovuju arhanizacyju, biaźvizavy režym dla hramadzianaŭ Biełarusi, dyviersifikacyju ekanomiki i enierhietyčnaha siektara krainy, finansavańnie restrukturyzacyi ekanomiki, pryciahnieńnie mižnarodnych finansavych instytutaŭ dla refarmavańnia ekanomiki krainy i zaachvočańnia inviestycyj.
U dekłaracyi nahadvajecca, što lidary hetych troch krain aktyŭna padtrymlivajuć pryncypy svabody i demakratyi i pryznajuć tolki svabodnyja, spraviadlivyja i prazrystyja vyniki vybaraŭ, praviedzienyja ŭ adpaviednaści ź Mižnarodnym paktam ab hramadzianskich i palityčnych pravach i pad kantrolem mižnarodnych naziralnikaŭ.
Kiraŭniki Litvy, Polščy i Rumynii ŭ dekłaracyi nahadali, što nichto inšy nie moža vyrašać los Biełarusi, a tolki jaje hramadzianie. Pavodle lidaraŭ, tolki demakratyčnaja budučynia, zasnavanaja na sacyjalnym dyjałohu i ahulnym bačańni z hramadskaściu, jość umovaj bolš stabilnaj i biaśpiečnaj Jeŭropy.
Lidary damovilisia dapamahać biełarusam budavać demakratyčnuju pravavuju dziaržavu, svabodnuju hramadzianskuju supolnaść i rynkavuju ekanomiku.
«Kali hramadzianie Biełarusi vyrašać pravieści ŭ krainie palityčnyja i ekanamičnyja reformy, stvaryć niezaležnyja instytuty dla abarony pravoŭ čałavieka i svabody słova, my dapamožam, padzialiŭšysia svaimi viedami i dośviedam», — skazaŭ Naŭsieda. Kiraŭniki dziaržavaŭ, jakija abviaścili dekłaracyju, zaklikali ŭsiu mižnarodnuju supolnaść dałučycca da raspracoŭki pazityŭnaha paradku dnia demakratyčnaj Biełarusi i pakieta padtrymki palityčnych, ekanamičnych i sacyjalnych źmienaŭ.
Prapanovy dla hetkaha płanu dapamohi buduć pradstaŭlenyja prezidentam Litvy na nastupnym samicie Jeŭrasajuza ŭ kancy tydnia.
Kamientary