Lidar pratestaŭ na MTZ Dyleŭski vyjšaŭ paśla 25 sutak: Za miažu źjechać nie prapanoŭvali
Siarhiej Dyleŭski — lidar stačkama MTZ. Paśla vybaraŭ jon arhanizavaŭ zabastoŭku na adnym z najbujniejšych zavodaŭ Minska. Potym Siarhiej uvajšoŭ u prezidyum Kaardynacyjnaj rady.
U kancy žniŭnia Dyleŭski byŭ asudžany spačatku na 10 sutak, a paśla jašče na 15 sutak aryštu. Razam ź im adnačasova sudzili i Volhu Kavalkovu.
Adnak Kavalkova źjechała za miažu, Dyleŭski ž paśla 25 sutak vyjšaŭ na volu.
«Naša Niva»: Jakija ŭražańni pakinuli 25 sutak, što vy praviali ŭ źniavoleńni?
Siarhiej Dyleŭski: Kali niechta byŭ na strohim režymie ŭ turmie, to cudoŭna mianie zrazumieje, što tam i jak.
«NN»: Fizičnuju siłu suprać vas prymianiali?
SD: Dziakuj Bohu, što nie. Uvohule skažu, što ŭ Žodzinie stavilisia całkam prystojna. Było paru indyviduumaŭ u hetaj turmie, jakija navat nie jak supracoŭniki, a jak ludzi. U asnoŭnaj masie achova, jakaja da nas była zamacavanaja, narmalna stavicca da viaźniaŭ.
«NN»: Karmili taksama narmalna?
SD: Ź ciažkaściu možna nazvać ježaj, što nam davali. Ratavali pieradački.
«NN»: Pytańnie, jakoje cikavić najbolš: ci prapanoŭvali vam źjechać za miažu?
SD: Nie, takoha nie było.
«NN»: I supracoŭniki KDB nie prychodzili z hutarkami?
SD: Nie.
«NN»: Nie było čakańnia, što mohuć uvohule nie vypuścić, pačać suprać vas kryminalnuju spravu?
SD: Jano i ciapier jość, takoje čakańnie. Kožny dzień žyvu ŭ takim adčuvańni.
«NN»: Ja tak razumieju, što na sutkach vy siadzieli z «palityčnymi». Jak u ich nastroj?
SD: Tak, tolki na CIPie paru sutak byŭ nie z tymi, chto prachodziŭ pa palityčnych artykułach. Adčaju ŭ ich niama, chutčej, naadvarot.
«NN»: Vy sami dalej budziecie zajmacca palityčnaj dziejnaściu?
SD: Skažam tak: u palityku ja leźci nie chaču. Svaju hramadzianskuju pazicyju ja ahučvaŭ nie raz, vy jaje cudoŭna viedajecie. Što tyčycca palityki, to ja nie chaču joj zajmacca, u mianie dla hetaha niama ni ŭmieńniaŭ, ni viedaŭ. Ja prosta hramadzianin krainy, jaki vykazvaje svaju pazicyju.
«NN»: Vy ŭsio ž siabra prezidyuma Kaardynacynaj rady, budzie tam zastavacca?
SD: Ščyra kažučy, pakul nie viedaju, što tam adbyvajecca. Dni paśla vyzvaleńnia ja pravioŭ ź siamjoj. Ja nie viedaju, što tam, jak tam. Ničoha nie mahu skazać, bo ŭ mianie niama infarmacyi na hety momant, jakaja mahła być karysnaj navat mnie samomu.
«NN»: Nichto nie vychodziŭ z vami na suviaź? Łatuška, Kavalkova?
SD: Nie.
«NN»: Siarhiej, što ŭ vas z pracaj? Vas nie zvolnili?
SD: Pakul nie viedaju. Ja siońnia prystupaju da pracy a 7-j viečara. U mianie hrafik «try na try». Spačatku try dni pracuju ad siomaj viečara da siomaj ranku. Potym try vychadnych, paśla — try dni ad siomaj ranku da siomaj viečara.
«NN»: Jak nastroj u vas?
SD: Nibyta pazityŭny. Što adbyłosia, toje adbyłosia. Na hetym žyćcio nie skančajecca.
«NN»: U niadzielu nie chadzili na akcyju?
SD: Nie, pravodziŭ čas ź siamjoj.
Kamientary