Były ministr kultury i pasoł Biełarusi ŭ Polščy i Francyi Pavieł Łatuška ŭ svaim telehram-kanale ahučyŭ infarmacyju, što bližejšym časam sa struktury MZS budzie zvolniena bolš za 30 rabotnikaŭ.
Heta supracoŭniki i centralnaha aparatu Ministerstva, i ludzi, što pracavali ŭ dypłamatyčnych pradstaŭnictvach za miažoj.
«Naša Niva» daviedałasia proźviščy dvuch čałaviek z hetaha śpisu supracoŭnikaŭ MZS. Havorka pra rabotnikaŭ centralnaha aparatu viedamstva — Paŭła Karatkieviča i Andreja Trusava.
Spadar Karatkievič byŭ druhim sakratarom Departamienta źniešnieekanamičnaj dziejnaści. U razmovie z karespandentam «NN» spadar Karatkievič paćvierdziŭ, što ad 18 vieraśnia nie źjaŭlajecca supracoŭnikam MZS, ale padrabiaznaści zvalnieńnia vyrašyŭ nie ahučvać.
Pavieł Karatkievič. Fota z fejsbuka.
Taksama pracy pazbaviŭsia Andrej Trusaŭ — druhi sakratar Hałoŭnaha ŭpraŭleńnia Azii i Afryki. Trusaŭ byŭ adzinym supracoŭnikam MZS, jaki vałodaŭ indaniezijskaj movaj.
Andrej Trusaŭ. Fota z fejsbuka.
I Karatkievič, i Trusaŭ — vypuskniki rasijskaha MHIMO, dzie navučalisia pa kvocie ad biełaruskaha MZS. Jašče raniej byŭ zvolnieny Andrej Misiura, treci sakratar pasolstva Biełarusi ŭ Indyi. Jon taksama źjaŭlajecca vypusknikom MHIMO.
Pa źviestkach «Našaj Nivy», pracy pazbaviacca dypłamaty, što na siońnia pracujuć u Łatvii, Polščy, Bielhii. Mnohich vyklikajuć da 28 vieraśnia ŭ rasparadžeńnie MZS.
«Zvalnieńni adbyvajucca ci praz toje, što supracoŭniki vykazalisia ŭ sacyjalnych sietkach suprać hvałtu, ci admovilisia ŭdzielničać u falsifikacyi vybaraŭ na ŭčastkach za miažoj. Na źniešniepalityčnym kirunku ŭ nas adbyvajecca poŭnaje fijaska. Prachodzić začystka dypłamataŭ, što pryviadzie da razbureńnia sistemy MZS. Prymajucca kadravyja rašeńni pa łajalnaści da ŭłady, a nie pa prafiesijanaliźmie. Ja chacieŭ by vykazać słovy padtrymki biełaruskim dypłamatam, jakija zaniali svaju pryncypovuju pazicyju», — skazaŭ Pavieł Łatuška ŭ kamientary «Našaj Nivie».