U Hrodnie zaviali kryminalnuju spravu pa skarhach na źbićcio siłavikami. Pra heta staršynia Hrodzienskaha abłvykankama Uładzimir Karanik paviedamiŭ padčas sustrečy 22 vieraśnia z akciorami dramteatra, kali tyja skardzilisia, što nivodnaj kryminalnaj spravy na siłavikoŭ nie zaviali. Zapis razmovy trapiŭ u redakcyju Hrodna.life.
— Naš artyst byŭ źbity 10 žniŭnia! <…> I adnoj kryminalnaj spravy nie zaviali! — kazali akciory padčas sustrečy 22 vieraśnia.
— Ja vam skažu, što zaviali adnu kryminalnuju spravu, — adkazaŭ na heta Uładzimir Karanik.
Pra detali spravy Uładzimir Karanik nie raspavioŭ. Atrymać kamientar u pres-słužbie upraŭleńnia Śledčaha kamiteta Respubliki Biełaruś pa Hrodzienskaj vobłaści Hrodna.life nie ŭdałosia. Raniej u viedamstvie admaŭlalisia davać kamientary pa spravach, uzbudžanych paśla pratestaŭ. «Kali budzie nieabchodnaść i my nie budziem škodzić śledstvu, my budziem zacikaŭleny dać kamientar», — paviedamlali Hrodna.life ŭ SK.
Pravaabaroncy paviedamili pra 200 źbitych u Hrodnie. Pa ich słovach, tolki kožny treci źviarnuŭsia sa skarhami, pakolki ludzi bajacca pieraśledaŭ.
Taksama viadoma, što ŭ Hrodnie zaviali kryminalnuju spravu pa fakcie ŭdziełu nieŭstanoŭlenych asob u masavych biesparadkach. Hrodziencaŭ pačali vyklikać u pravaachoŭnyja orhany ŭ jakaści śviedak pa im. Sprava zaviedzienaja pa artykule 342 KK Biełarusi — «Arhanizacyja i padrychtoŭka dziejańniaŭ, jakija hruba parušajuć hramadski paradak, albo aktyŭny ŭdzieł u ich». Jaje rasśleduje Śledčy kamitet pa Hrodzienskaj vobłaści.
