Fota Vadzima Zamiroŭskaha, Tut.by
Na advakata Ludmiłu Kazak składziena dva pratakoły pa artykułach 23.34 i 23.4 KaAP — udzieł u niesankcyjanavanym masavym mierapryjemstvie i niepadparadkavańnie patrabavańniam supracoŭnikaŭ milicyi. U pratakołach śviedkami zapisanyja asoby sa źmienienymi piersanalnymi źviestkami. Pra heta Kazak raspaviała svaim abaroncam, jakich puścili da jaje ŭ IČU na Akreścina, piša Tut.by.
Jak raskazali TUT.BY abaroncy Ludmiły Kazak Viktar Mackievič i Śviatłana Harbatok, jany nie mahli trapić da klijenta ŭ IČU bolš za try hadziny. Administracyja IČU spačatku spasyłałasia na karancin, potym — na ŭnutranyja «mierapryjemstvy» ŭ IČU. U vyniku advakataŭ puścili IČU pa adnym.
— Ludmiła raspaviała, što jaje schapili na vulicy Kamunistyčnaj, kali jana padychodziła da mašyny, troje mužčyn. Adzin, jak jana zrazumieła, byŭ supracoŭnikam AMAPa, a dvoje — nieviadoma chto, u maskach. Jaje pryvieźli ŭ Centralny RUUS, pracavaŭ ź joj supracoŭnik RAUS Usik. Skłali pratakoły pa artykułach 23.34 i 23.4 KaAP — udzieł u niesankcyjanavanym masavym mierapryjemstvie i niepadparadkavańnie patrabavańniam supracoŭnikaŭ milicyi. Nibyta 30 žniŭnia jana była na masavym mierapryjemstvie na praśpiekcie Pieramožcaŭ. Nasamreč jana była ŭ hety dzień u HC «Halilea» z dačkoj, kuplali rečy da škoły. Śviedkami ŭ pratakołach byli paznačany «Ivanovy Ivany Ivanavičy» — to jość asoby, čyje piersanalnyja dadzienyja źmienienyja. Kopii pratakołaŭ joj nie ŭručyli. Z materyjałami spravy nie aznajomili, — raspavioŭ TUT.BY Viktar Mackievič.
Pa słovach Kazak, supracoŭniki milicyi, jakija razmaŭlali ź joj, pavodzili siabie napyšliva i pa-chamsku, nazyvali «damačka» i kazali «vy tut, i pavinny padparadkoŭvacca našym patrabavańniam».
— Ihnaravali jaje słovy, što joj treba ŭ sudovaje pasiadžeńnie da 14 hadziny. Ludmiła prasiła patelefanavać mužu, Čajčycu (Viktar Čajčyc — kiraŭnik Biełaruskaj respublikanskaj kalehii advakataŭ), Švakavu (Alaksiej Švakaŭ — staršynia Minskaj haradskoj kalehii advakataŭ), vyklikać advakata, vyklikać chutkuju, bo ŭ jaje było drennaje samaadčuvańnie. Patrabavali razbłakavać telefon, jana admoviłasia, nichto nie chavaŭ toje, što «nam cikavyja vašy telefony». Va ŭsich pratakołach i ŭ asobnych skarhach jana pisała, što heta pieraśled za prafiesijnuju dziejnaść, što rečy, jakija kanfiskavali, ŭtrymlivajuć advakackuju tajamnicu. Ludmile, viadoma, ciažka, stan pakidaje žadać lepšaha, ale jana mocnaja žančyna i trymajecca, hłyboka aburanaja tym, što adbyvajecca, — raspaviali abaroncy Kazak.
Advakaty zajaŭlajuć: fakt brutalnaha zatrymańnia i źniavoleńnia ŭ IČU, pradjaŭleńnia nadumanych administracyjna-pravavych pretenzij kaža pra toje, što na advakata Ludmiłu Kazak akazvajecca cisk i ažyćciaŭlajecca jaje pieraśled u suviazi z prafiesijnaj dziejnaściu z metaj dyskredytavać jaje i pakarać za pryncypovuju i aktyŭnuju prafiesijnuju pazicyju.
