Minabarony Ukrainy nazvała mahčymuju pryčynu krušeńnia samalota z kursantami
Techničnaja niaspraŭnaść, chutčej za ŭsio, stała pryčynaj krušeńnia samalota An-26 pad Charkavam, paviedamiŭ ministr abarony Ukrainy Andrej Taran.
«Zdaryłasia niejkaja techničnaja niaspraŭnaść. Što mienavita, budziem vyśviatlać. Nie mahu pakul ničoha raskazać pra vučeńni… Papiaredniuju acenku zmožam dać paśla rasšyfroŭki čornaj skryni», — adznačyŭ Taran.
Vajenna-transpartny samalot An-26 paciarpieŭ krušeńnie ŭ piatnicu ŭviečary kala horada Čuhujeva Charkaŭskaj vobłaści padčas navučalnaha palotu. Na borcie znachodzilisia 27 čałaviek: siem členaŭ ekipaža i 20 kursantaŭ, adnaho kursanta da palotaŭ nie dapuścili. Zhodna sa źviestkami ofisa hienprakurora, zahinuli 25 čałaviek, adnak Dziaržsłužba pa NS paviedamiła, što na ranicu suboty pošuki jašče dvaich čałaviek praciahvajucca.
Dvoje kursantaŭ vyžyli: jany paśpieli vyskačyć z samalota ŭ apošni momant, ich špitalizavali ŭ ciažkim stanie. Pa fakcie krušeńnia raspačali spravu pa artykule ab parušeńni praviłaŭ palotaŭ i padrychtoŭki da ich, što pryviało da katastrofy i ciažkich nastupstvaŭ.
«Pa płanie samalot pavinien byŭ zrabić da 10 uźlotaŭ i pasadak pa 15 chvilin kožnaja, pačynajučy z 18:30 i da 23 hadziny, adpracoŭvajučy standartnuju praceduru navučańnia. Paśla kožnaj pasadki samalot ahladaŭsia techničnymi śpiecyjalistami i ŭźlataŭ znoŭ», — napisaŭ u subotu namieśnik kiraŭnika Ministerstva ŭnutranych spraŭ Ukrainy Anton Hieraščanka ŭ Facebook.
Pavodle jaho słoŭ, kamandzir karabla ŭsiaho nalataŭ kala 800 hadzin.
Ciapier čytajuć
Chto taki Maćviej Bialaj, jakoha nibyta departavali ŭ Biełaruś? Raskazvajem historyju dziŭnaha aktyvista z padazronym minułym1
Kamientary