Fota Nadziei Bužan
MUS nie paviedamiła dakładnaj ličby zatrymanych u Biełarusi za palityku ŭčora. «Usiaho za minułyja sutki pa krainie zatrymana zvyš 350 čałaviek da razhladu ŭ sudzie spraŭ pa administracyjnych pravaparušeńniach», — havorycca ŭ paviedamleńni MUS.
Miž tym pravaabaroncy-viasnoŭcy majuć imiony 380 zatrymanych učora jak minimum u 20 nasielenych punktach krainy: ad Minska praź Michanavičy i Bierazino da Oršy.
Jak praviła, pravaabaroncy niazdolnyja ŭličyć usich zatrymanych, kali ich kolkaść takaja vialikaja, i realnaja kolkaść bolšaja za ich statystyku.
Takim čynam, usiaho ŭ Biełarusi za čas prezidenckaj kampanii i pratestaŭ suprać falsifikacyi vybaraŭ adbyłosia, jak minimum, kala 13 210 zatrymańniaŭ.
«Naša Niva» atrymała hetuju ličbu, splusavaŭšy źviestki Ministerstva ŭnutranych spraŭ za asobnyja dni ad pačatku pratestaŭ. U tyja dni, kali źviestki MUS byli mienšyja, čym śpisy pravaabaroncaŭ pa proźviščach, abo nie publikavalisia, my ŭklučali ličbu, sabranuju pravaabaroncami.
Pikam zatrymańniaŭ stali 9-12 žniŭnia, kali, zhodna sa źviestkami MUS, zatrymali «bolš za» 6700 čałaviek (dakładnych ličbaŭ za tyja dni MUS nie pradastaviŭ, a pravaabaroncy byli niazdolnyja padličyć, zatrymańniaŭ było zašmat).
Zatrymanych u Biełarusi za hetaje leta bolš, čym było internavana ŭ Polščy časoŭ «Salidarnaści». Tam za pieryjad vajennaha stanovišča byli internavanyja 10 123 čałavieki.
Kab ludzi ŭ inšych krainach mahli ŭjavić sabie maštaby ŭ Biełarusi, u prajekcyi na kolkaść nasielnictva, dadzienaja kolkaść zatrymańniaŭ adpaviadaje prykładna 205 000 u praporcyi da nasielnictva Rasii, 60 000 — dla Polščy ci Ukrainy.
U kožnym razie, heta najbolšy chapun u najnoŭšaj historyi Biełarusi.
