«Miarkuju, što napieradzie ŭ nas dobryja stasunki z amerykancami. Ja absalutna ŭ hetym upeŭnieny. Mabyć, pryjšoŭ čas, i Boh dakładna vyrašyŭ, što chopić. Davajcie siadajcie, razmaŭlajcie i rabicie stasunki lepiej», — zajaviŭ Łukašenka.
Kiraŭnik Biełarusi raźličvaje, što ŭdasca prasunuć adnosiny z novaj administracyjaj ZŠA. «Abama razumny čałaviek. Jak mnie raspaviadaŭ Dźmitry Anatoljevič Miadźviedzieŭ, jon lahičny, uspryimlivy čałaviek, jon razumieje, umieje słuchać, robić peŭnyja vysnovy. Kali jon taki, navošta jamu bicca ź Biełaruśsiu? Jakuju vialikuju škodu ad Biełarusi moža atrymać Ameryka? Nijakaj. A karyści ‑‑ značna bolej», — razvažaje Łukašenka ŭ interviju infarmacyjnamu ahienctvu Reuters.
Vytrymki ź interviju raspaŭsiudziŭ Interfaks.
Havoračy pra mahčymaść viartańnia ambasadara ZŠA ŭ Miensk, Łukašenka zajaviŭ:
«Kali ambasadar vierniecca dla taho, kab kraina praciahnuła sankcyi suprać majoj Biełarusi, to navošta tut hety ambasadar ci ambasada?»«Kali amerykancy chočuć supracoŭničać, bačyć nas partnerami, a dla hetaha treba mieć paŭnakroŭnuju ambasadu i ambasadara, to zaprašajem».
«Kali amerykancy chočuć narmalizavać stasunki, a my heta havorym praz dyplamatyčnyja kanały, ja pra heta publična kažu, my zaŭsiody da hetaha hatovyja», — padkreśliŭ Łukašenka.
Kiraŭnik Biełarusi hatovy vieści dyjaloh z ZŠA, kali skasujuć sankcyi suprać biełaruskich pradpryjemstvaŭ: «Ale tolki patrebna viarnucca choć by na tyja pazycyi, ź jakich my pačali paharšeńnie našych stasunkaŭ. Viarnucca na hod ci dva tamu, kali ZŠA pačali ŭvodzić sankcyi suprać kalektyvaŭ pradpryjemstvaŭ, jakija naahuł praamerykanska nastrojenyja, bo jany pracavali z amerykancami na ichnym rynku».
Dačynieńni z ZŠA byli sapsavanyja jašče ŭ siaredzinie 90‑ch hadoŭ. A ŭviadzieńnie sankcyj suprać kancernu «Biełnaftachim» na pačatku 2008 hodu pryviało da dyplamatyčnaha kanfliktu. Ambasadarka ZŠA Karen Stjuart vymušana była pakinuć Biełaruś, a skład ambasady značna źmienšyŭsia. Amerykanski bok uvioŭ sankcyi, patrabujučy vyzvaleńnia palitviaźniaŭ. Paśla taho jak apošni palitviazień ź mižnarodna pryznanaha śpisu vyjšaŭ na volu, ZŠA admianili sankcyi suprać dvuch biełaruskich pradpryjemstvaŭ.