Advakat Šklarava: Cichanoŭski byŭ na sustrečy Łukašenki z palitviaźniami

Subotniaja sustreča Alaksandr Łukašenki ŭ SIZA KDB z palitviaźniami, u tym liku ź Viktaram i Eduardam Babarykami, Lilijaj Ułasavaj, palittechnołaham Vitalom Šklaravym dahetul u centry ŭvahi. U paniadziełak ranicaj advakat Vitala Šklarava Anton Hašynski sustreŭsia sa svaim padabaronnym i raspavioŭ Tut.by pra jaho ŭražańni.

— Takoha nikoli jašče nie było, kab kiraŭnik krainy pryjechaŭ razmaŭlać sa źniavolenymi, jakich pryznajuć palityčnymi. Ja nie viedaju takoha, kab Pucin ci Tramp rabili niešta padobnaje.

Ja ŭbačyŭ siońnia Vitala — jaho Łukašenka zaprasiŭ na razmovu razam ź Cichanoŭskim i Babarykam, jakich Vital na hetaj sustrečy ŭbačyŭ upieršyniu. Jany praviali piać hadzin — razmaŭlali ab budučyni Biełarusi, pratestach i kanstytucyjnaj reformie, — raspavioŭ Hašynski.

Paśla sustrečy, užo pry raźvitańni, kali Vital cisnuŭ ruku Łukašenku, jon paskardziŭsia, što daŭno nie byŭ u łaźni.

— Tady Łukašenka skazaŭ adnamu sa svaich achoŭnikaŭ: «Dzima, arhanizuj». Dzie dakładna ŭ łaźni jany byli, Vital nie viedaje, ale ich usich advieźli ŭ łaźniu biez kanvoju. Dali mahčymaść spakojna pamycca i pahutaryć pamiž saboj. Ja bačyŭ siońnia Vitala litaralna niekalki chvilin, ale jasna, što ŭsio, što adbyłosia, było vialikaj niečakanaściu dla jaho — jon nie čakaŭ, što razmova budzie — jak jon vykazaŭsia — nastolki adkrytaj i budzie mahčymaść paspračacca z prezidentam tvaram u tvar. Vital kaža, što heta pieršyja čałaviečyja vychodnyja za try miesiacy.

Hašynski ličyć, što pa palityčnych źniavolenych užo pryniata rašeńnie.

— Zdajecca, što hetaja sustreča — pačatak dyjałohu, pazityŭny znak. Ale ruch dalej nieabchodny, spyniacca i spačyvać na łaŭrach rana, — reziumavaŭ advakat.

Na sustrečy ŭ subotu prysutničali Viktar i Eduard Babaryka, juryst, člen Kaardynacyjnaj rady Lilija Ułasava, biznesoviec Jury Vaskrasienski, palittechnołah Vital Šklaraŭ. Na sustrečy taksama byli Kirył Badziej, jaki da aryštu zajmaŭ pazicyju v. a. staršyni praŭleńnia Biełhazprambanka, a taksama dyrektar IT-kampanii PandaDoc Dźmitryj Rabcevič, jurysty Maksim Znak i Illa Salej. Rabceviču i Vaskrasienskamu ŭ subotu źmianili mieru strymańnia.

U siužetach, jakija vyjšli na dziaržTB, a taksama ŭ telehram-kanale «Puł pieršaha», pakazali bujnym płanam amal usich udzielnikaŭ sustrečy, u kadry tolki niemahčyma apaznać mužčynu ŭ ciomnaj kiepcy, jaki siadzić pamiž jurystami Znakam i Salejem. Nie vyklučana, što heta i byŭ Siarhiej Cichanoŭski.

Za stałom znachodziłasia jak minimum 12 čałaviek akramia Łukašenki.

• 0
• 0
• 0
• 0
• 0
• 0
• 0
• 0