Siońnia ŭ štab‑kvatery Mižnarodnaj federacyi chakieju (IIHF) u Ciurychu projdzie hieneralnaja prezentacyja zajavak krainaŭ‑kandydataŭ na praviadzieńnie chakiejnaha čempijanatu śvietu 2014 hodu. Biełaruś padaje svaju zajaŭku ŭžo treci raz.
Ad piaci pieršapačatkovych pretendentaŭ zastalisia čatyry: Biełaruś, Vuhorščyna, Łatvija i Ŭkraina; Čechija vyrašyła skancentravacca na zajaŭcy‑2015. Kančatkovaje rašeńnie adnosna krainy‑haspadyni suśvietnaha pieršynstva 2014 hodu budzie ahučanaje 8 ci 9 traŭnia padčas štohadovaha Kanhresu Mižnarodnaj federacyi chakieju ŭ Bernie. Biełaruś na forumie budzie pradstaŭlać eks‑ministar unutranych spraŭ Uładzimier Navumaŭ.
Prava pryniać čempijanat śvietu ŭ chakiei Biełaruś damahajecca ŭžo treci raz. Na papiarednich etapach biełarusaŭ paśladoŭna apiaredzili Niamieččyna i Švecyja, dzie pieršynstvy adbuducca, adpaviedna, u 2010 i 2013 hadoch. Treciaja sproba, na dumku kiraŭnictva Federacyi chakieju Biełarusi, musić stać udałaj. Adnak hałoŭny redaktar spartovaj hazety «Priessboł» Uładzimier Bieražkoŭ, jaki praciahły čas adpracavaŭ na pasadzie vice‑prezydenta chakiejnaj federacyi i nieadnojčy braŭ udzieł u Kanhresach IIHF, kaža, što ŭ dadzienym vypadku rabić aptymistyčnyja prahnozy nie vypadaje:
«Ja b nie staŭ rabić niejkija prahnozy da hałasavańnia. Ja 8 hadoŭ adpracavaŭ u Federacyi chakieju i 8 hadoŭ jeździŭ na hetyja kanhresy. Ułasna kažučy, dobra viedaju specyfiku hetaj publiki, viedaju, jak jany hałasujuć. Tam tabie mohuć paabiacać: tak, my abaviazkova za ciabie prahałasujem, ale pry hetym zrobiać usio z dakładnaściu naadvarot. Sprava ŭ tym, što hałasavańnie tajemnaje, kožnaja kraina maje dva hałasy – dva delehaty kanhresu ŭ papiercy ŭpisvajuć ci vykreślivajuć tuju ci inšuju krainu. I navat nia zmožaš daviedacca, chto nasamreč ciabie vykraśliŭ. Tamu štości tut pradrakać składana. U nas cudoŭnyja šancy. Pavodle prapanavanych umovaŭ Biełaruś maje pieravahu pierad usimi krainami. Chiba što ŭ hetym planie my možam paraŭnacca z Łatvijaj, ale Łatvija ŭžo pravodziła čempijanat śvietu, i lahičniej było b dać šaniec Biełarusi».
Harantyi zabieśpiačeńnia mižnarodnaha klasu spabornictvaŭ davalisia spartovym funkcyjaneram z IIHF navat na ŭradavym uzroŭni. Miesiac tamu Miensk naviedaŭ prezydent Mižnarodnaj federacyi chakieju Rene Faziel. Jaho pryniaŭ asabista premjer‑ministar Siarhiej Sidorski. Staršynia Savietu ministraŭ zajaviŭ, što spartovy kompleks «Minsk‑Arena», jaki majucca kančatkova dabudavać da 7 listapada 2009 hodu, moža pryniać blizu 17 tysiač hledačoŭ. A heta istotna bolš, čym analahičnyja mahčymaści krainaŭ‑kankurentaŭ. Miesiacam raniej Miensk naviedaŭ staršynia zajavačnaha kamitetu IIHF Ernest Aljančyč. Tady ŭpieršyniu było abvieščana, što letam 2009‑ha pačniecca realizacyja prajektu na ŭźviadzieńnie čarhovaha ladovaha pałacu ŭ mienskim mikrarajonie Čyžoŭka.
Siońnia ŭ Švajcaryi ahitavać za Biełaruś budzie asabista staršynia Federacyi chakieju, u niadaŭnim minułym ministar unutranych spraŭ Uładzimier Navumaŭ. Heta paćvierdziŭ hałoŭny redaktar «Priessboła» Uładzimier Bieražkoŭ. Pry hetym spadar Bieražkoŭ adznačyŭ, što Navumaŭ užo zrabiŭ niekalki niečakanych zajavaŭ:
«Tak, ciapier Navumaŭ u Švajcaryi, u pryvatnaści, u Bernie. Učora jon nam daŭ interviju. Darečy, adzin vielmi važny momant jon akcentavaŭ u svajoj zajavie: maŭlaŭ, Biełaruś padčas čempijanatu śvietu 2014 hodu zrobić biaźvizavy ŭjezd u krainu. To bok, hramadzianie lubych krainaŭ na dva tydni zmohuć pryjechać u Biełaruś biaź vizy. Heta dosyć śmiełaja i navat radykalnaja zajava. I heta moža niadrenna zhulać za chakiej, skažam tak».
Pry hetym Uładzimier Navumaŭ spadziajecca, što na praviadzieńni čempijanatu śvietu Miensk moža zarabić pryblizna 50 miljonaŭ dalaraŭ. Jašče na niekalki miljonaŭ razbahacieje Federacyja chakieju Biełarusi. Zastałasia tolki drobiaź – vyjhrać u kankurentaŭ. Hałasavańnie pa krainach‑kandydatach adbudziecca 8 traŭnia. Vyniki vybaraŭ buduć ahučanyja albo ŭ toj ža dzień, albo nazaŭtra, 9 traŭnia.
U Švajcaryi Ŭładzimier Navumaŭ apynuŭsia, niahledziačy na kampaniju supracivu. Pravaabaroncy ź Biełarusi i Švecyi Aleś Bialacki i Marcin Uhła źviarnulisia da kiraŭnictva Mižnarodnaj federacyi chakieju z zaklikam nie dapuścić pryjezdu Navumava ŭ Bern. Jany zaznačali, što kiraŭnik Federacyi chakieju Biełarusi hienerał Navumaŭ padazrajecca ŭ datyčnaści da surjoznych parušeńniaŭ pravoŭ čałavieka i ŭvachodzić u lik biełaruskich čynoŭnikaŭ, jakim zabaronieny ŭjezd u Eŭraźviaz i ZŠA. Pravaabaroncy zhadvali pra mahčymuju suviaź eks‑ministra sa źniknieńniem čatyroch biełaruskich apazycyjaneraŭ, siarod jakich i kolišni kiraŭnik MUS Biełarusi Jury Zacharanka ‑‑ pavodle supadzieńnia, siońnia roŭna 10 hadoŭ, jak Zacharanka źnik pry zahadkavych abstavinach. Adnak u vyniku da hołasu pravaabaroncaŭ nichto tak i nie prysłuchaŭsia.
