Tut.by: Načnaja ataka na Savieckaje RUUS Minska kaktejlami Mołatava adbyłasia, mahčyma, na terytoryi dvara
U Telegram-kanale Ministerstva ŭnutranych spraŭ źjaviłasia infarmacyja ab tym, što nieviadomyja kinuli ŭ dvor Savieckaha RUUS try «kaktejli Mołatava», u vyniku čaho zahareŭsia słužbovy aŭtobus. Tut.by pasprabavaŭ razabracca ŭ hetaj historyi.
Viedajučy, dzie znachodzicca RUUS i majučy videa zdareńnia, možna pryblizna adnavić chod padziej.
Na videa bačna trajektoryja palotu butelki: jana paralelnaja linii pryparkavanych mašyn i pralataje prykładna nad łabavym škłom UAZ «Patryjot» i lehkavoha aŭtamabila. Hetaha dastatkova, kab pravieści liniju i pryblizna vykazać zdahadku, adkul možna było kinuć butelku.
Kali adkryć Google-karty i pravieści pramuju liniju, što supadaje z trajektoryjaj, to najbližejšy punkt za płotam RUUS, adkul možna kinuć butelku, raźmieščany na adlehłaści 27 mietraŭ.
Uličvajučy, dzie lacieła butelka, jana pavinna była być kinuta pryblizna z punktu ŭ levaj častcy zdymka, paznačanaj kryžam, i prykładna pa trajektoryi, praviedzienaj biełaj linijaj.
Kali vykazać zdahadku, što čałaviek, kab kinuć «kaktejl Mołtava», spuściŭsia z nasypu ŭniz i pajšoŭ da płota, jamu b pryjšłosia kidać butelku pa jašče bolš krutoj trajektoryi, kab pierakinuć jaje cieraz płot vyšynioj kala dvuch z pałovaj mietraŭ z kalučym drotam naviersie.
Vysiłak, kab snarad apisaŭ vialikuju parabału i pralacieŭ kala 30 mietraŭ, pavinien być vielizarnym.
Važyć snarad bolš čym paŭkiło — haručaje ŭnutry plus sama plaška. Chutčej za ŭsio, pieravažnaja bolšaść ludziej z hetym nie spravicca.
Kali ž spuścicca z nasypu i padyści bližej da płota, to adlehłaść atrymajecca mienš za 15 mietraŭ. Ale i trajektoryja palotu butelki nie budzie paralelnaja łabavomu škłu.
Na zdymku sa spadarožnika jakraz na tych ža miescach stajać dźvie mašyny, a linija pakazvaje kirunak takoha palotu (hł. Schiemu vyšej).
Ciapier varta jašče raz pryhledziecca da videa.
Trajektoryja palotu «kaktejlu Mołatava» na videa bačnaja vyrazna. I heta nijak nie moža być taja samaja parabała «kidka na 27 mietraŭ», bo ŭ hetym razie my b bačyli tolki apošniuju jaje «častku» — dla hledačoŭ heta b vyhladała, niby snarad padaje amal viertykalna ŭniz. Zamiest hetaha my nazirajem, jak butelka apisvaje praktyčna poŭnuju duhu — bačny i ŭźlot, i padzieńnie. Takaja trajektoryja mahła mieć miesca tolki ŭ adnym vypadku: snarad kidali z zanadta blizkaj adlehłaści, a mienavita — z terytoryi samoha RUUS.
Takim čynam, možna mierkavać, što nieviadomyja złamyśniki niejkim čynam pierabralisia praz kalučy drot, trapili ŭ dvor RUUS, adtul kinuli try kaktejli.
Piać faktaŭ pra Natallu Piatkievič — samuju ŭpłyvovuju čynoŭnicu Biełarusi da źjaŭleńnia Kačanavaj i Ejsmant26
Kamientary