«Try razy na dzień prychodzili tak zvanyja nahladčyki». Jak prajšoŭ tydzień pad chatnim aryštam Lilii Ułasavaj?
Adna z najlepšych biełaruskich jurystaŭ, miedyjatar i člen prezidyuma Kaardynacyjnaj rady Lilija Ułasava z 31 žniŭnia znachodziłasia ŭ SIZA. Paśla taho, jak tudy na niečakany «dyjałoh» pryjechaŭ Aleksandr Łukašenka, palitźniavolenyja pačali pastupova vychodzić na volu.
Pra toje, što ŭ liku tych, kamu mieru strymańnia źmianili na chatni aryšt, jość Lilija Ułasava, 19 kastryčnika paviedamiŭ Juryj Vaskrasienski: žančyna vyjšła ź SIZA KDB jašče ŭviečary 16 kastryčnika, i Vaskrasienski sam advioz jaje dadomu. A siońnia, 23 kastryčnika, stała viadoma, što z Ułasavaj uvohule źniali ŭsie abmiežavańni.
Amal praz tydzień znachodžańnia Lilii doma Uładzimir Iskarcaŭ, jaje muž, raspavioŭ «Našaj Nivie», jak siabie ciapier adčuvaje žonka.
Uładzimir kaža, što ŭ piatnicu ŭ jaho było pradčuvańnie, što niešta adbudziecca.
— A kali jaje pryvieźli, ledź strymaŭ ślozy, ź vialikaj ciažkaściu, — dzielicca mužčyna. — Lila była ŭ absalutnym stresie, i navat svajakam my da paniadziełka nie raskazvali, što jana ŭžo doma.
Radavaŭsia viartańniu haspadyni i sabaka Žula: nie adychodziŭ ad jaje paŭdnia, łaščyŭsia. Praŭda, vyhulvać jaho možna tolki ŭ dvary, na terytoryi doma. Heta adna z umoŭ chatniaha aryštu. Kamunikuje ž Lilija tolki z mužam i advakatami.
— Da nas try razy na dzień, rankam, dniom i ŭviečary prychodzili tak zvanyja nahladčyki, kab kantralavać, ci sapraŭdy doma žonka. Na dniach zavitali amal u 23.45, i da hetaha času pryjšłosia nie spać, čakajučy. Ale my ŭsie ŭmovy vykonvali, bo bajalisia, kab Lilu znoŭ nie pieraviali pad vartu praz parušeńnie režymu, — raskazvaje Uładzimir.
Mužčyna taksama adznačaje, što adčuvaje siabie žonka nie lepšym čynam: mučać hałaŭnyja boli, jana drenna śpić.
— Ëj patrebnaje lačeńnie i reabilitacyja, kab nabracca sił i ad usiaho adklučycca. Navat psichałahičnaja traŭma tut, dumaju, ciažkaja, — kaža surazmoŭca.
Nahadajem, Liliju Ułasavu zatrymali 31 žniŭnia. Rabili heta supracoŭniki Departamienta finansavych rasśledavańniaŭ KDK. U domie Ułasavaj praviali pieratrus. Potym stała viadoma, što ŭ dačynieńni da jaje raspačali kryminalnuju spravu pa č. 2 art. 243 KK RB (Uchileńnie ad vypłaty padatkaŭ).
Kamientary