«Tyja dni, jak u tumanie», — kaža maci piaci dziaciej Alena Vałkovič, jakaja dahetul nie moža adyści ad šoku. Jana ciapier ciažarnaja šostym i chutka pavinna jechać u radzilniu. U sieradu, 28 kastryčnika, jany z mužam źbirali rečy ŭ balnicu, a praź niekalki chvilin jaho zatrymali.
Fota z archiva siamji
Zdaryłasia heta ŭviečary ŭ Minsku.
«My rychtavalisia da radzilni, prasavali dziciačyja rečy. Mužu patelefanavali, i jon skazaŭ, što adłučycca na piać chvilin, terminova patrebna dapamoha. My pierajazdžali niadaŭna, ja padumała, što patrebna dapamoha susiedziam u pieranoscy rečaŭ. Na 40 tydni pra drennaje nie dumajecca. I muž vyjšaŭ u chatniaj adziežy, majcy z karotkim rukavom. Prajšła hadzina, dźvie, jaho telefon maŭčaŭ.
Ja ŭklučyła internet i žachnułasia ad paviedamleńniaŭ susiedziaŭ. Jany pisali, što napali piać-šeść čałaviek u bałakłavach i zaciahnuli ŭ aŭtazak niekalki ludziej. Ja zrazumieła, što moj muž tam, siarod ich», — dzielicca Alena.
Što adbyłosia ŭ toj viečar, dakładna nieviadoma. Niekatoryja detali žančyna daviedałasia praz advakata. Kali da padjezda padjechali łukašenkaŭcy ŭ maskach, tam stajali dziaŭčyna z chłopcam i jaje muž Ihar. Im prapanavali prajści ŭ aŭtazak. Ihar pačaŭ pytacca, za što — i jaho ŭdaryli pa tvary. Paśla ŭsie pajšli ŭ aŭtazak.
Mužčynu dastavili ŭ Maskoŭskaje RUUS, paśla na Akreścina. U piatnicu adbyŭsia sud. Za artykuł 17 (Chulihanstva) Iharu dali 13 sutak. Kudy jaho adpravili paśla suda, Alena nie viedaje.
«Taki žyviolny strach. Ja nie spała hetyja nočy, kali b nie dzieci, zusim by z katušak źlacieła… Stolki płanaŭ było. Dumali, jak siamja budzie sustrakać mianie z małoj z radzilni. Ihar u aŭtaparku damoviŭsia ŭziać aŭtobus u arendu, chacieŭ płakatami i šarami ŭpryhožyć.
Ciapier ni taty, ni sustrečy. Ciažka schavacca i zrabić vyhlad dla dziaciej, što ŭsio dobra».
Pa płanie Alena voś-voś pavinna naradzić. Ale jana miarkuje, što dačka źjavicca na śviet užo paśla viartańnia muža.
Šmatdzietnaja maci pryznajecca, što jany akazalisia ŭ ciažkim stanoviščy. Siamja časova zastajecca biez karmilca, a ŭ pačatku miesiaca pavinna płacić pa kredytach. Alena — fatohraf, navat na dziaviatym miesiacy jana jeździć na zdymki, kab chapiła pakryć usie raschody.
