«Ličyli za aŭtaryteta». Adzin ź lidaraŭ mahiloŭskich pratestaŭ Vaładar Curpanaŭ raspavioŭ pra dni ŭ niavoli
3 listapada ŭnačy paśla čarhovych «sutak» vypuścili ź izalatara pravaabaroncu i adnaho ź lideraŭ pratestavaha ruchu ŭ Mahilovie Vaładara Curpanava. Za kratami jon hetym razam pravioŭ 21 dzień. Ahułam ža ŭ niavoli paśla vybaraŭ jon adbyŭ 43 dni, ź jakich 10 trymaŭ suchuju haładoŭku. Suprać aktyvista da taho ž raspačali kryminalnuju spravu za abrazu sudździ, piša Radyjo Svaboda.
«Ličyli za aŭtaryteta»
Ź izalataru Vaładar vyjšaŭ a pałovie na druhuju nočy. Na voli jaho sustreli žonka Iryna, siabry dy žurnalisty. Im jon zajaviŭ, što ŭ izalatary «dobra adpačyŭ» i nastroj u jaho badziory.
Pavodle aktyvista, u viaźnicy staŭleńnie da «palityčnych» pryjaznaje. Umovy, u jakich siadzieŭ Vaładar, «dazvalajuć kazać, što jaho ličyli za aŭtaryteta». U jaho byŭ asobny kubak, dva matracy, davali kipień, dy tolki dvojčy achoŭniki zapatrabavali, kab jon zakłaŭ na kalidory ruki za śpinu. Bolšuju častku terminu Vaładar siadzieŭ u kamery adzin. Adzinota jaho nie pryhniatała, choć, pryznajecca jon, «aŭdytoryi časam brakavała».
«Knižki tam jość. Biblija ratavała, — apaviadaje pra niavolnickija budni aktyvist. — Biez hadzińnika było, praŭda, składana. Ichnaje radyjo ja vyklučyŭ adrazu, tamu adsočvać čas było niaprosta, asabliva ŭ druhoj pałovie dnia».
«Mahli pakinuć jašče na kolki dzion. Da hetaha psychalahična byŭ hatovy»
Na voli Vaładara Curpanava čakali 27 kastryčnika, kali kančalisia jahonyja čarhovyja 15 dzion aryštu, ale ŭ izalatary jaho pakinuli jašče na 6 dzion. Ich jon nie adbyŭ praz suchuju haładoŭku, jakuju trymaŭ raniej, pratestujučy suprać niezakonnaha źniavoleńnia. Paśla 10 dzion haładavańnia ŭ vyniku paharšeńnia stanu jaho tady dastavili ŭ lakarniu, dzie aktyvist prabyŭ tydzień.
Vaładar dapuskaŭ, što ŭ izalatary jaho mahli pakinuć jašče na kolki dzion, i da hetaha psychalahična byŭ hatovy. Jon nia viedaje, što źmianiłasia ŭ krainie, pakul byŭ za kratami, ale dumaje, kali b niešta niebiaśpiečnaje adbyłosia dla režymu, to zrazumieŭ by pa pavodzinach achovy, a jany byli zvykłymi.
Pra zmarnavany ŭ niavoli čas aktyvist škaduje, adnak ličyć, što heta «dla niečaha patrebna». Jon adznačaje, što ŭ kamery pracavaŭ nad prajektam «razbudovy haradzkoj partyi». Napisaŭ 27 zajavaŭ i skarhaŭ na ŭnutranyja prablemy izalataru, a taksama pytańni pa-za im.
Pra kryminalnuju spravu: «Ich aburyła, jak ja dazvoliŭ sabie tak pavodzicca na sudzie»
Dasłaŭ taksama list i ŭ Śledčy kamitet z pratestam na dziejańni śledčaha, jaki, na jahonuju dumku, parušyŭ paradak zaviadzieńnia kryminalnaj spravy. Supracoŭnik paviedamiŭ aktyvistu, što ŭ jahonych dziejańniach jość skład złačynstva, ale pry hetym pryznačyŭ ekspertyzu abraźlivaha vykazvańnia.
Curpanaŭ miarkuje, što kryminalnaja sprava nia maje perspektyŭ, bo ŭ jahonych słovach niama abrazy sudździ, a raspačali jaje dla «psychalahičnaha cisku na inšych, kab jany nie dazvalali sabie padobnaha».
«Ich aburyła toje, što ja dazvoliŭ sabie tak pavodzicca na sudzie, — kaža jon. — Ź ichnaha hledzišča takija pavodziny ŭ dačynieńni da važnaj u ich systemie instytucyi nielha pakidać biespakaranymi».
Pieršy raz paśla vybaraŭ Vaładara Curpanava zatrymali 1 vieraśnia na školnaj liniejcy, kudy jon pryjšoŭ, kab zaklikać pedahohaŭ, jakija pracavali ŭ vybarčych kamisijach, pakajacca za falsyfikacyi vybaraŭ. Za hety ŭčynak jamu prysudzili 20 dzion aryštu. Zatym jaho jašče dvojčy jašče sudzili za ŭdzieł u akcyjach pratestu i adpraŭlali ŭ izalatar na 8 i 15 dzion.
Ciapier čytajuć
Jak skłaŭsia los vypusknikoŭ, jakimi žurfak hanaryŭsia 10 hadoŭ tamu? Historyja adnaho ŭračystaha kałaža29
Kamientary