Jakaja stancyja samaja dušeŭnaja, a na jakoj robiać najbolš fota? Prakacilisia na novaj linii mietro i raskazvajem, čaho čakać FOTA
Treciuju liniju mietro, jakaja ŭ budučym musić źviazać z centram Zialeny Łuh i Kurasoŭščynu, budavali šeść hadoŭ. Spačatku adkryćcio płanavałasia na 3 Lipienia, paśla — da vybaraŭ. U vyniku abrali Dzień kastryčnickaj revalucyi: čym nie znakavaje śviata?
Prakacicca ŭ novieńkim mietro pryjšli haradskija chipstary, piensijaniery, baćki ź dziećmi i sami rabotniki mietrapalitena. Dziasiatki noh hulajuć pa načyščanaj plitcy, dziasiatki telefonaŭ zdymajuć padziemnyja interjery. Asabliva cikava pahladzieć na hałoŭnuju fišku — dźviery na płatformie, ź jakimi mietro stanie bolš biaśpiečnym. Jany adčyniajucca tolki paśla taho, jaje spyniecca ciahnik. Na treciaj linii puskajuć adny cichija «štadlery».
«Vychad u horad — pa eskałatary», — kiruje patokami razhublenych pasažyraŭ supracoŭnik mietro.
Paru praktyčna vyviedzienych ličbaŭ:
— 44 siekundy — stolki spuskajecca eskałatar na stancyju «Jubilejnaja». Jana samaja hłybokaja ŭ minskaj padziemcy — kala 30 mietraŭ. Chacia paśla kijeŭskaj «Arsienalnaj» — drobiazi, kaniečnie.
— 6 chvilin — stolki času patrebna, kab prajechać usie «zialonyja» stancyi i dabracca ad univiersama «Čkałaŭski» da kinateatra «Biełaruś».
Bolš za ŭsich fota źbiraje «Płošča Franciška Bahuševiča». Niby ŭ litaraturnym muziei, haradžanie zatrymlivajucca kala pano z cytatami paeta. Pobač sa stancyjaj znachodzicca Siendajski skvier i Akademičny muzyčny teatr.
«Kavalskaja słabada» — samaja dušeŭnaja. Z kavanymi vycinankami na stoli (praca skulptaraŭ Paŭła Vajnickaha i Maryi Tarleckaj) i vyjavami pryrody ŭ marmury. Adzinaja stancyja treciaj linii biez kałon.
Na šyračeznaj płatformie «Vakzalnaj» zaŭvažaju Alhierda Bachareviča i zdymačnuju hrupu telekanała — paasobku.
«O, STB! Davaj im pieraškodzim», — z uśmieškaj reahujuć padletki na karespandentku Ksieniju Chudalej i jaje kalehu.
U pierachodach i na samich stancyjach stajać infaterminały. Tut možna vyvučyć schiemu mietro i raskład naziemnaha transpartu, pačytać pra Minsk. I tak, u mieniu jość biełaruskaja mova. A jašče kitajskaja i anhlijskaja.
Na pierasadačnych stancyjach ustalavali travałatary. Adrazu ŭspaminajecca aeraport i pryjemnaje čakańnie padarožžaŭ, jakija praz karanavirus i vybary amal źnikli z našaha žyćcia.
Napaliravany hranit, futurystyčnyja turnikiety, mnostva kamier nazirańnia… Idealny paradak i atmaśfieru śviata ŭ pieršy dzień pracy treciaj linii parušajuć tolki złamanyja eskałatary — na dźviuch z čatyroch stancyj. Prajaznyja, na žal, nichto nie doryć — chaj by i na 20 pajezdak.
Ja, pryznacca, amatar mietro — nie lublu miorznuć na prypynkach. Usio dziacinstva čakała, pakul vietku praciahnuć da maich Šabanoŭ. U vyniku skončyła škołu, univiersitet, a mietro da domu tak i nie dajšło. Navat sa schiem heta prajektavanaja stancyja pieryjadyčna źnikaje.
Pahladzim, jak chutka padziemki pad voknami dačakajucca žychary Kurasoŭščyny.
Kamientary