«Pieršyja čatyry samaloty Ił-76, jakija ažyćciaŭlajuć pierakidku rasijskich miratvorcaŭ u rajon vykanańnia zadač u zonie nahornakarabachskaha kanfliktu, vylecieli z aeradroma Uljanaŭsk-Uschodni. Na borcie pavietranych sudoŭ asabovy skład miratvorčaha złučeńnia, aŭtamabilnaja technika, bronietransparciory i materyjalnyja srodki», —cytuje TASS paviedamleńnie Minabarony RF.
Paźniej stała viadoma ab vylecie jašče dvuch samalotaŭ.
Usiaho dla razhortvańnia miratvorčaha kantynhientu ŭ zonu nahornakarabachskaha kanfliktu buduć pierakinutyja 1960 rasijskich vajskoŭcaŭ, 90 bronietransparcioraŭ, 380 adzinak aŭtamabilnaj i śpiecyjalnaj techniki.
Pierakidka padraździaleńniaŭ rasijskich miratvorcaŭ u rajon vykanańnia zadač ažyćciaŭlajecca kambinavanym sposabam z zadziejničańniem samalotaŭ Ił-76 vajenna-transpartnaj avijacyi, dadali ŭ vajennym viedamstvie.
9 listapada prezident RF Uładzimir Pucin, prezident Azierbajdžana Ilcham Alijeŭ i premjer-ministr Armienii Nikoł Pašynian padpisali sumiesnuju zajavu ab poŭnym spynieńni vajennych dziejańniaŭ u Nahornym Karabachu. Jak, u pryvatnaści, paviedamiŭ rasijski lidar, azierbajdžanski i armianski baki zastanucca na zaniatych pazicyjach, a ŭ rehijonie buduć raźmieščanyja rasijskija miratvorcy.
Pavodle infarmacyi Minabarony RF, asnovu kantynhientu składuć padraździaleńni 15-j asobnaj motastrałkovaj bryhady (miratvorčaj) Centralnaj vajskovaj akruhi. Jak udakładnili ŭ viedamstvie, dla kantrolu za vykanańniem damoŭlenaściaŭ ab spynieńni vajennych dziejańniaŭ rasijskija naziralnyja pasty buduć vystaŭleny ŭzdoŭž linii sudakranańnia ŭ Nahornym Karabachu i ŭzdoŭž Łačynskaha kalidora, jaki złučaje Armieniju i Nahorny Karabach. Kamandavańnie miratvorčaj apieracyjaj budzie raźmiaščacca ŭ rajonie horada Ściepanakiert.
Kamientary