«Nie było času kazać, čamu zatrymlivajem». Pačaŭsia sud nad dziaŭčynaj, jakaja ŭkusiła amapaŭca
Apošnija dva miesiacy Natalla Rajentava znachodzicca ŭ śledčym izalatary. Jaje zatrymali paśla žanočaha maršu 29 žniŭnia. Videa, dzie ludzi ŭ čornym vyciahvajuć z tralejbusa brata i siastru, ablacieła sacyjalnyja sietki.
Natalla i jaje brat Alaksandr užo adsiadzieli sutki za ŭdzieł u akcyi, ciapier dziaŭčynu vinavaciać pa kryminalnym artykule — za hvałt u dačynieńni da amapaŭca, jaki jaje zatrymlivaŭ.
Jak adznačyŭ prakuror, Rajentava ŭkusiła supracoŭnika za levaje ściahno. Dziaŭčyna kaža, što zrabiła heta, bo spałochałasia. Paciarpiełamu balničny nie davali, jon adrazu ž viarnuŭsia na słužbu.
Spravu ŭ sudzie Centralnaha rajona razhladaje sudździa Taćciana Akavitaja. Pavodle abvinavačvańnia, Natalla Rajentava viečaram 29 žniŭnia razam z bratam uziała ŭdzieł u niesankcyjanavanym masavym mierapryjemstvie. U toj dzień prachodziŭ žanočy marš. Kali siłaviki pačali adsiakać kałonu, brat ź siastroj pabiehli ŭ bok prypynku, dzie zaskočyli ŭ tralejbus. Za imi — jašče ź dziasiatak pasažyrak. Hetym Rajentavy i pryciahnuli da siabie ŭvahu. Jak paśla budzie adznačana ŭ pratakole ab administratyŭnym pravaparušeńni, jany kiravali ŭdzielnikami pratestu, rukoj pakazvali im kirunak. U vyniku sud daŭ Natalli i Alaksandru administratyŭny aryšt.
Na svabodu Natalla ŭžo nie vyjšła, jaje ŭziali pad vartu pa abvinavačvańni ŭ złačynstvie (prymianieńnie hvałtu ŭ dačynieńni da supracoŭnika pravaachoŭnych orhanaŭ, art. 364 KK — karajecca abo aryštam, abo abmiežavańniem svabody da piaci hod, abo pazbaŭleńniem svabody da šaści hod). Pa viersii śledstva, dziaŭčyna padčas zatrymańnia chapałasia za adzieńnie amapaŭca, ukusiła jaho za levaje ściahno.
Natalla admoviłasia davać pakazańni ŭ sudzie i adkazać, ci pryznaje siabie vinavataj. Tady sudździa začytała pakazańni, jakija jana dała śledstvu. Tam adznačana, što Natalla pryznaje, što ŭkusiła amapaŭca, kaža, što zrabiła heta, bo spałochałasia, adznačaje, što ludzi ŭ čornym adzieńni nie pradstavilisia i nie paviedamili, za što jaje zatrymlivajuć. Paciarpiełym pa spravie prachodzić Andrej Chomič, kamandzir apieratyŭnaj roty AMAP. 29 žniŭnia razam z kalehami jon pracavaŭ na akcyi, pierasoŭvalisia na mikraaŭtobusie biez numaroŭ, vysočvali najbolš aktyŭnych udzielnikaŭ.
Rajentavy pryciahnuli ŭvahu, bo rukami pakazvali žančynam zachodzić u tralejbus, kali zaŭvažyli busik z amapaŭcami. Na nastupnym prypynku siłaviki ich dahnali, zajšli ŭ sałon i pasprabavali zatrymać, najpierš, Alaksandra («zadača mužčyn zatrymlivać najpierš»), tut ža stajała Natalla, jakaja ŭchapiłasia rukami za poručni, hučna kryčała, nie davała zatrymać ni siabie, ni brata. Pa zhadkach Chomiča, kryk stajaŭ taki, što razmaŭlać było niemahčyma, choć paciarpieły nastojvaje, što niechta ź jaho kaleh usio ž pradstaviŭsia, dvoje z čatyroch supracoŭnikaŭ byli ŭ čornaj formie, z šaŭronam «AMAP».
Uchilajučysia, Natalla apynułasia faktyčna na padłozie, Chomič adčuŭ bol ad ukusu. Pryčynu zatrymańnia, nie chavaje milicyjanier, bratu i siastry skazali ŭžo ŭ mikraaŭtobusie, kudy ich zanieśli na rukach. U tralejbusie, pa jaho słovach, nie było času tłumačyć Rajentavym, čamu ich zatrymlivajuć.
Paśla afarmleńnia Rajentavych u Maskoŭskim RAUS Chomič źviarnuŭsia pa miedycynskuju dapamohu ŭ špital MUS, dzie, pa jaho słovach, jamu apracavali ranu. Pry hetym adzieńnie ad ukusu paškodžana nie było. Balničny jamu nie vypisvali, chutka amapaviec viarnuŭsia na słužbu.
Siońnia ŭ sudzie Andrej Chomič zajaviŭ, što aceńvaje maralnyja pakuty ŭ 2 tysiačy rubloŭ. Pa jaho słovach, paśla toj situacyi jaho imia źjaviłasia ŭ «śpisie karnikaŭ», jaho rodnym pisali i zvanili. Sudździa źviarnuła ŭvahu, što Rajentavu abvinavačvajuć u inšym. Sama Natalla padkreśliła, što była pad vartaj i nie mieła nijakaj mahčymaści raspaŭsiudžvać infarmacyju ŭ internecie.
Tady Chomič skazaŭ, što maralny bol jamu byŭ naniesieny ŭ vyniku fizičnaha ŭkusu. Na pytańnie advakata, ci nie pierabolšanaja heta suma, amapaviec adkazaŭ, što tak nie ličyć.
Kamientary