NieBiaryDaHałavy-Orchestra

Dla taho, kamu hrymotnyja ryfy i hamana Bela Music-09 nie ŭ kajf, kaho volnaje pavietra vialikaha kancertu ŭžo nie torkaje, i chto pierakanany, što čas rakenrolnych hierojaŭ minuŭsia, u kancy viasny toj maje nahodu patrapić na šoŭ dla dušy - adviedać kampaktny zborny kancert “Leta-Party”, u jakim zajhrajuć hurty, jakija ŭ svajoj muzycy spałučajuć usio-usialakaje: ad šansona, klejźmiera, cyhanskich arkiestraŭ da roka i rehiej.

1.Partyja Leta

Siońnia na našaj scenie, u eru post-usiaho źjaviłasia cełaja frakcyja hurtoŭ, da jakoj akramia ŭdzielnikaŭ kancertu( “Małanka-Orchestra”, “Bosaje sonca”, The Unlimited Trio, Recha) peŭna, možna zanieści jašče i hrupu “Žaba ŭ kalainie”. Nazaviem ich Partyjaj Leta. Ustupić u tuju partyju (nie)skaładana. Pa-pieršaje, musiš mieć nie aby jakuju muzyčnuju adukacyju: treba virtuozna hrać na skrypcy, kłasičnaj hitary, duchavych abo na cymbałach dy śpiavać pastaŭlennym hołasam. Pa-druhoje, musiš mieć myśleńnie miksiera – pastajanna miašać usio styli: ska, post-pank, łacinaamierykaskija matyvy i navat uciosaŭski džaz mała nie ŭ adnoj miełodyi. Andrej Zajcaŭ, lider hutra “Bosaje sonca”: “Amal usie ŭ nas - udzielniki roznych kłasičnych konkursaŭ, ale va ŭłasnaj tvorčaści my nie abmiažoŭvajemsia adnym akresłym nakirunkam - biarem ŭziać lepšaje ad usich stylaŭ”.

2.Pieśni baradatych hieołahaŭ

Pa-treciaje, słovy, nie duža abciažaranyja pasyłam: zasmučanaja kachańnie, letnija impresii i ramantyka 30-60-ch: avijatary, hieołahi i palarniki. Navat biełaruskaja mova ŭ letaŭcaŭ – nie pratest, nie pazicyja, jak toje było z rok-hurtami 90-ch, a čarhovy instrumient. Publiku muzykanty čaplajuć absurdyzmam tekstaŭ, ahulnaj nastrajovaściu i amal absalutnaj adsutnaściu pozy rok-hierojaŭ. Jak by kažuć “At, nie biarycie vy ničoha da hałavy, navat našych pieśniaŭ”.

Pres-kanfierencyja, pryśviečanaja Leta-party, što adbyłasia nadoječy ŭ Puškinskaj biblijateki, była adno nahodaj dla ŭdzielnkaŭ budučaha kancertu prademanstravać palityku partyi: paviesialić publiku, zajhraŭšy pa niekalki pieśniaŭ.

Takim paradkam, 30 traŭnia, Moładzievy teatr estrady (Maskoŭskaja, 18): Muzyčny soniečny prajekt (u supravaždeńni akciorkaha šoŭ) “Leta-party”. Udzieł biaruć hurty: “Małanka-Orchestra”, “Bosaje sonca”, The Unlimited Trio, Recha. Moładzi i zamiežnikam padabajecca. Prychodźcie - budzie, m-m, alternatyŭnieńka. Darečy, admysłova da kancertu vyšła CD-kružełka ź pieśniami ŭdzielnikaŭ.

• 0
• 0
• 0
• 0
• 0
• 0
• 0
• 0