Heta byŭ najlepšy hod za ŭsie časy, što ja siabie pamiataju! Kali b 31 śniežnia 2019 hoda mnie dali pačytać chranałohiju 2020 hoda, ja b skazaŭ: «Afihieć, dajcie dva!» Tak, pakul nie zdaryŭsia toj samy dzień, kali na hulańni ź fiejervierkami vyjdzie ŭsia kraina. Ale ničoha strašnaha, značyć, budzie čym adznačycca i 2021 hodu.
Ja nie viedaju, jaki kankretny epizod vyłučyć z usich hetych maršaŭ z sotniami tysiač udzielnikaŭ. Napeŭna, 30 žniŭnia, kali natoŭp źbiraŭsia kala Steły i metanakiravana rušyŭ da Pałaca Niezaležnaści. Ja adpraviŭsia ŭ samaj hałavie i padyšoŭ da samaha łancuha siłavikoŭ i ich techniki. A tam taki reljef, što ad Steły treba iści ŭniz. I voś hladziš na ludziej — płyvie biaskoncaje bieł-čyrvona-biełaje mora na ŭvieś haryzont. Z kožnaj chvilinaj jano bližej-bližej-bližej… I raz na chvilinu-dźvie natoŭp vymaŭlaje takoje ahłušalnaje «U-u-u-u-u-u!», što siłaviki niervova pierastupajuć z nahi na nahu: a raptam sapraŭdy pojduć na šturm?
Ale try samyja mocnyja momanty-abstaviny-dni ŭsio ž inšyja.
3) Ja prapuściŭ pieršy tur Śviatłany Cichanoŭskaj pa haradach Biełarusi. Ale toje, što adbyvałasia ŭ Hłybokim — Navapołacku — Viciebsku, uražvała navat praz manitory. Tamu ŭ trochdzionnaje turne ad Smarhoni da Słonima ja pajechaŭ sam. I nie paškadavaŭ ni na chvilinu.
Samaje emacyjnaje z hetych vybarčych sustreč — vychad Cichanoŭskaj na scenu pad «Mury». Jana ŭśmichajecca, ale nasamreč płača. Ludzi hladziać na jaje, dumajuć pra jaje aryštavanaha muža — i mnohija taksama płačuć.
Pikavy momant — heta kalidor honaru na mitynhu ŭ Horadni, kali kandydatka z achovaj idzie pad avacyi praz šmattysiačny natoŭp, a ludzi padbiahajuć, kab zrabić sełfi z novaj rok-zorkaj.
2) Hetuju źjavu składana patłumačyć niejkaj adnoj scenkaj, bo padobnych historyj byli dziasiatki. Heta toj momant, kali ty jedzieš na mašynie, a paŭsiul uzdoŭž darohi bačyš ludziej ź bieł-čyrvona-biełymi ściahami. Jany stajać u Sierabrancy, u Kamiennaj Horcy, u Zialonym Łuzie — prosta paŭsiul. Na samaj zabytaj boham vulicy!
Inšy momant — ludzi iduć kałonaj svajho rajona na Marš. Ty im sihnališ, a jany ŭsie — sotni ci navat tysiačy čałaviek — u adkaz pakazvajuć tabie simvał pieramohi. Ty ich čakaŭ 20 hadoŭ, i voś narešcie jany vyjšli — pryčym adrazu ŭsie!
1) Uvieś dzień 9 žniŭnia — samy skancentravany niezabyŭny zhustak enierhii. Čerhi achvotnych prahałasavać ad samaj ranicy — na ŭvachodzie na moj učastak kala 20 naziralnikaŭ, jakija kaardynujuć ludziej — abjezd samych haračych učastkaŭ Minska: u čarzie ŭ Ržaŭcy tysiačy čałaviek…
9 žniŭnia, viečar. Čarha na ŭčastak dla hałasavańnia ŭ Minsku ŭ Ržaŭcy. Fota dasłaŭ čytač «Našaj Nivy»
…U škole kala «Dana-Moła» skončylisia biuleteni — na maim učastku ŭ Hrušaŭcy ŭ čarzie adnamomantava stajać bolš za 300 čałaviek, amal usie ź biełymi stužkami — na padliku hałasoŭ pracentaŭ 80-90% biuleteniaŭ składzienyja harmonikam, jak prasiła Cichanoŭskaja — pry hetym staršynia kamisii abviaščaje pieramohu Łukašenki — pad učastkam bolš za sotniu čałaviek, jakim ja abviaščaju vyniki vybaraŭ…
Ludzi čakajuć vynikaŭ padliku hałasoŭ kala adnaho z učastkaŭ Minska. Fota dasłaŭ čytač «Našaj Nivy»
…Prašu ludziej padvieźci nas z Nadziaj Bužan u bok Steły — užo kala «Karony» ruch staić namiertva, ale na vulicach narodnyja hulańni — razumieńnie pieramohi — la Steły čuvać vybuchi, bačym tysiačy čałaviek, siarod jakich vyłučajucca futbolnyja fanaty — aŭtazak źbivaje čałavieka — ludzi budujuć simvaličnyja barykady — siłaviki zakidvajuć ludziej vybuchovami pakietami — doktarka z chutkaj dapamohi płača nad akryvaŭlenym demanstrantam: «My jaho nie daviaziom»…
…Šmattysiačnaja kałona rušyć pa Ramanaŭskaj Słabadzie, vychodzić na praśpiekt Niezaležnaści, dzie ŭžo čakajuć siłaviki, i patrochi razychodziacca, abiacajučy znoŭ sabracca zaŭtra…
Žychary Minska błakujuć vulicy ŭ rajonie ŭniviersama «Ryha», patrabujučy sumlennaha pierapadliku hałasoŭ. 10 žniŭnia
…Niedzie a 3-j nočy sustrakajemsia z kalehami kala Steły, dzie niekatoryja pakinuli mašyny.
Apoŭnačy nastupnaha dnia adna z hetych kaleh, Nataša Łubnieŭskaja, budzie lažać u Balnicy chutkaj dapamohi z prastrelenaj nahoj, a ja budu lažać tvaram na travie na «Puškinskaj» sa źviazanymi rukami ŭ čakańni aŭtazaka. Na žal, biez takich vydatkaŭ vytvorčaści abyścisia niemahčyma. Ale jak kažuć, heta była ŭžo zusim inšaja historyja.
