Armianskija vajskoŭcy abviaścili pra źniknieńnie 73 bajcoŭ u Karabachu
Ludzi źnikli ŭ rajonie dźviuch hornych viosak na poŭdni Nahornaha Karabachu, vakoł jakich u apošnija niekalki dzion razhareŭsia kanflikt, piša VVS.
Ministerstva abarony niepryznanaj Nahorna-Karabachskaj Respubliki pozna ŭviečary ŭ sieradu paćvierdziła, što jamu dahetul nieviadomy los 73 čałaviek, jakija znachodzilisia ŭ rajonie hetych dźviuch viosak.
Adnačasova vajskoŭcy zajavili, što čutki ab značna bolšaj kolkaści źnikłych — da 171 čałavieka — nie adpaviadajuć rečaisnaści.
Kanflikt vakoł viosak Chcabierd i Chin Tachier (azierbajdžanskija nazvy — Čajłakkała i Kiochnie Tahłar) u harach na poŭdni Karabacha razharnuŭsia na minułych vychodnych.
Hetyja vioski apynulisia faktyčna ŭ tyle azierbajdžanskaj armii, ale na momant zakančeńnia vajny 10 listapada ŭ ich zastavalisia armianskija ŭzbrojenyja atrady dobraachvotnikaŭ.
Na vychodnych azierbajdžanskija vajskoŭcy rušyli ŭ hetyja vioski, kab uziać ich pad kantrol.
Zaviazaŭsia boj, u vyniku jakoha niekalki dziasiatkaŭ armianskich dobraachvotnikaŭ, miarkujučy pa roznych źviestkach ź miesca padziej, byli akružanyja i zdalisia.
Adnak suviaź ź dziasiatkami armianskich bajcoŭ, jak śćviardžajuć Ściepanakiert i Jerevan, źnikła.
U sieradu častka ź ich — kala 30 čałaviek — vyjšła da svaich, i vyśvietliłasia, što azierbajdžanskija vajskoŭcy, razzbroiŭšy ich, pravodzili da bazy rasijskich miratvorcaŭ i adpuścili.
Ciapier čytajuć
Babaryka try chviliny adkazvaŭ na pytańnie, čyj Krym. Tak i nie adkazaŭ151
Kamientary