Vidavočcu śmierci Hienadzia Šutava abvinavacili ŭ zamachu na zabojstva

Śledztva ŭ spravie Alaksandra Kardziukova ŭžo zavieršana. Razhlad jaho spravy moža pačacca ŭ najbližejšyja miesiacy, piša Radyjo Svaboda.

• Bieraściejec Hienadź Šutaŭ zahinuŭ padčas pratestaŭ paśla prezydenckich vybaraŭ.
• Jon byŭ paranieny strełam u patylicu la doma № 334 na Maskoŭskaj vulicy ŭ Bieraści 11 žniŭnia.
• Niekalki dzion Hienadź Šutaŭ pravioŭ u reanimacyi bieraściejskaha špitala, zatym jaho viertalotam pieravieźli ŭ vajskovy špital u Miensku.
• Pamior Šutaŭ 19 žniŭnia.
• Aficyjnaja pryčyna śmierci — traŭmatyčny aciok hałaŭnoha mozhu, paškodžańnie ŭ vyniku strełu z ručnoj ahniastrelnaj zbroi ź niavyznačanymi namierami.

Kryminalnuju spravu raspačali suprać zabitaha, a nie zabojcaŭ

Jašče da śmierci Šutava Śledčy kamitet raspaŭsiudziŭ zajavu, zhodna ź jakoj pravaachoŭniki ŭ Bieraści papraŭdzie prymianiali ahniastrelnuju zbroju suprać hrupy ahresiŭna nastrojenych pratestoŭcaŭ, uzbrojenych armaturaj.

Proźvišča Šutava pry hetym nie nazyvałasia. U kancy vieraśnia vydańnie «Medyjazona» apublikavała videazapisy, zroblenyja kamerami nazirańnia la doma № 334 na Maskoŭskaj vulicy ŭ mierkavany momant zabojstva Šutava. Z apublikavanych videa składana adnaznačna vyznačyć pryčyny kanfliktu i toje, chto mienavita z boku pravaachoŭnikaŭ u im udzielničaŭ.

Rodnyja Hienadzia Šutava nastojvajuć, što jon nia byŭ udzielnikam pratestaŭ i nia moh napadać na milicyjantaŭ z armaturaj u rukach.

Kryminalnaja sprava pa fakcie zabojstva Hienadzia Šutava zaviedzienaja nie była. SK paviedamlaŭ pra spravu na samoha Šutava pavodle artykułu ab supraciŭleńni supracoŭnikam orhanaŭ unutranych spraŭ. Jana dahetul nie zakrytaja, niahledziačy na śmierć Šutava.

Jahonyja rodnyja znachodziacca pad padpiskaj ab nievydavańni i nia mohuć kamentavać detali.

Novaje abvinavačańnie dla śviedki Kardziukova

U hetaj spravie byŭ jašče adzin fihurant — siabra Hienadzia Šutava Alaksandar Kardziukoŭ. Jon ža źjaŭlajecca vidavočcam padziej poźniaha viečaru 11 žniŭnia.

Paśla kanfliktu ź niavyznačanymi asobami, jaki skončyŭsia dla Šutava ahniastrelnym ranieńniem u patylicu, Kardziukovu ŭdałosia ŭciačy. Jaho zatrymali tolki 14 žniŭnia.

Za hety čas Alaksandar Kardziukoŭ paśpieŭ raskazać svajmu susiedu pa haražach, što zmoh schavacca ad siłavikoŭ pad balkonam adnaho z damoŭ pa Maskoŭskaj vulicy. A taksama pra toje, što nia viedaŭ ab śmiarotnym ranieńni Hienadzia Šutava i ličyŭ, što taho zatrymali i jon znachodzicca ŭ IČU Bieraścia.

Paśla zatrymańnia Alaksandra Kardziukova chutka pieraviali ŭ SIZA № 1 na vulicy Vaładarskaha ŭ Miensku. A taksama abvinavacili pavodle častki 2 artykułu 363 Kryminalnaha kodeksu («Supraciŭleńnie supracoŭniku orhanaŭ unutranych spraŭ albo inšaj asobie, jakaja achoŭvaje hramadzianski paradak»). Hety artykuł praduhledžvaje pakarańnie ŭ vyhladzie pazbaŭleńnia voli terminam da 5 hadoŭ.

Jak stała viadoma Svabodzie, ciapier Alaksandra abvinavačvajuć užo ŭ zamachu na zabojstva (častka 2 artykułu 139 KK). Śledztva aficyjna skončanaje, baki znajomiacca z materyjałami spravy. U vypadku pryznańnia ŭ sudzie vinavatym Alaksandru Kardziukovu pavodle novaha artykułu moža pahražać navat śmiarotnaje pakarańnie.

«Bratu čarhovy raz padoŭžyli ŭtrymańnie pad vartaj, — raskazała Svabodzie siastra Alaksandra Kardziukova Maryna. — Da 15 studzienia ciapier, zdajecca. Ciapier advakaty znajomiacca z materyjałami, śledztva ŭžo zavieršanaje. Advakaty padali novyja chadajnictvy. Buduć jašče razhladać ich. Kali budzie sud i dzie, my nia viedajem. Chaciełasia b, kab jon prachodziŭ u Bieraści, viadoma. My vielmi na heta spadziajomsia».

Pa słovach Maryny, nia ŭsie jaje listy za hety čas dajšli da brata. Ad Alaksandra taksama listy iduć z prablemami, niekatoryja ź ich jon pierapisvaŭ trojčy, ale cenzura ŭsio adno ich nie prapuskała. Adnak niekalki dzion tamu joj dazvolili sustreču z Alaksandram u SIZA.

«Za čatyry miesiacy nam dali adno spatkańnie z bratam, — raskazvaje Maryna. — 24 śniežnia my byli z bratavaj žonkaj u jaho. Razmaŭlali z Sašam u Miensku na Vaładarcy. Jon nia skardzicca. Viadoma, byŭ u šoku, kali jamu źmianili artykuł abvinavačańnia. Ale potym uziaŭ siabie ŭ ruki. Pieražyvaje, viadoma. Ciapier u jaho artykuł 139, častka 2 («Zabojstva». — RS). Zamach na zabojstva razhladajuć pavodle taho ž artykułu, što i zabojstva. Čamu artykuł źmianili, nijak nie patłumačyli. Prosta pastavili pierad faktam. Saša taksama znajomiŭsia z materyjałami spravy, ale jon nia viedaje, čamu tak adbyłosia. Advakat padała chadajnictva, kab spravu ŭvohule zakryli. Jana nia bačyć tam dokazaŭ vinavataści brata ŭ niečym. Saša nie idzie na kantakt sa śledčymi, nie havoryć ź imi».

Maryna miarkuje, što spravu mahli pierakvalifikavać dla taho, kab całkam apraŭdać tych, chto stralaŭ. Žančyna taksama dapuskaje, što spravu jaje brata Alaksandra Kardziukova mohuć razhladać u zakrytym sudzie.

• 0
• 0
• 0
• 0
• 0
• 0
• 0
• 0