«Supracoŭniki milicyi apieratyŭna reahavali na paviedamleńni hramadzian». U MUS prakamientavali ŭčarašnija zatrymańni ŭ dvarach
U MUS prakamientavali abstaviny ŭčarašnich zatrymańniaŭ u minskich dvarach. Milicyja nazyvaje videa zatrymańniaŭ «pravakacyjnymi videanarezkami».
«Va Uruččy sabrałasia hrupa ludziej ź niezarehistravanaj simvolikaj i zładziła ŭ dvary šumnaje šeście. Ludzi, što hulali, pad hučnuju muzyku i kryki śviacili ŭ vokny damoŭ lichtarykami i łazierami, nie zabyvajučy pry hetym pravodzić demanstratyŭnyja fotasiesii dla nastupnaha raspaŭsiudžvańnia ŭ internecie.
Supracoŭniki milicyi apieratyŭna reahavali na paviedamleńni hramadzian pra verchał, što adbyvajecca, i zatrymlivali najbolš aktyŭnych parušalnikaŭ hramadskaha paradku», — paviedamlaje MUS.
Kamientuje milicyja i videa z Novaj Baravoj (dzie ŭ rukach u nieviadomaha padčas zatrymańnia ludziej bačyli zbroju).
«Na žal, kadraŭ, jakija demanstrujuć, što ž hetamu papiaredničała, dla prahladu nie prapanavana: kampanija maładych ludziej raźviešvała niezarehistravanuju simvoliku. Ubačyŭšy pravaachoŭnikaŭ, kinułasia chto kudy. Adzin z supracoŭnikaŭ, kryknuŭšy: «milicyja», dahnaŭ dziaŭčynu. Mužčyny, jakija znachodzilisia ŭ hety čas u dvary, stali jaho abražać i pasprabavali vyzvalić zatrymanuju. U adkaz milicyjanier čarhovy raz papiaredziŭ ab niepravamiernaści dziejańniaŭ tych, chto sabraŭsia, zatym dastaŭ traŭmatyčnuju zbroju, adpichnuŭ nahoj mužčynu, što na jaho nabližaŭsia, kab pavialičyć dystancyju, i da prybyćcia patrulnaj hrupy kantralavaŭ situacyju».
Pavodle źviestak MUS, 5 studzienia zatrymali 25 čałaviek.
Kamientary