«Biełaruśkalij» paabiacaŭ źniać dyscyplinarnyja spahnańni z rabotnikaŭ i ŭziać nazad zvolnienych
«Biełaruśkalij» hatovy ŭzajemadziejničać z narviežskaj kampanijaj Yara na doŭhaterminovaj asnovie ŭ halinie pramysłovaj biaśpieki i pryniać śpiecyjalistaŭ kampanii dla manitorynhu vytvorčych pracesaŭ. Akramia taho, zvolnienyja raniej rabotniki mohuć znoŭ być pryniatyja na pracu, kali padaduć zajavy. Adpaviedny pres-reliz byŭ apublikavany 20 studzienia na sajcie «Biełaruśkaliju», paviedamlaje Tut.by.
— My znachodzimsia ŭ pastajannym kantakcie i praciahniem u dalejšym supracoŭnictva z kampanijaj «Jara» ŭ pytańniach biaśpieki ŭmoŭ pracy, palapšeńnia zdaroŭja i pavyšeńnia sacyjalnaha ŭzroŭniu našych rabotnikaŭ, — havorycca ŭ pres-relizie «Biełaruśkaliju». — Kiraŭnictvam pradpryjemstva pryniataja pastanova ab źniaćci dyscyplinarnych spahnańniaŭ z rabotnikaŭ pradpryjemstva (pres-reliz ad 17 śniežnia 2020 hoda), a zvolnienyja raniej rabotniki mohuć być pryniatyja nazad na pracu ŭ AAT «Biełaruśkalij» u vypadku padačy imi adpaviednych zajaŭ.
Taksama administracyja «Biełaruśkaliju» abmierkavała razam z prafsajuznymi arhanizacyjami pradpryjemstva pavyšeńnie efiektyŭnaści raboty hramadskaha kantrolu za biaśpiekaj vytvorčaści. U najbližejšy čas najmalnik i prafsajuzy ŭniasuć adpaviednyja prapanovy pa ŭdaskanaleńni «pałažeńnia pa rabocie hramadskich inśpiektaraŭ».
Jak raźvivałasia situacyja z «Biełaruśkalijem» i Yara
Narviežskaja kampanija Yara — najbujniejšy suśvietny vytvorca ŭhnajeńniaŭ i adzin z asnoŭnych handlovych partnioraŭ «Biełaruśkaliju». Biełaruskaja kalijnaja kampanija tradycyjna pracuje ź joj pa piacihadovych kantraktach. Da prykładu, pa damovie 2011-2015 hadoŭ BKK pastaŭlała kampanii Yara bolš za 1 miljon ton kalijnych uhnajeńniaŭ štohod.
U vieraśni pradstaŭniki Yara pieršy raz pryjechali ŭ Minsk na pieramovy z pradstaŭnikami Biełaruskaj kalijnaj kampanii i prafsajuzaŭ. Napiaredadni hetaha vizitu Yara raźmiaściła na svaim sajcie paviedamleńnie, u jakim vykazała zaniepakojenaść situacyjaj u Biełarusi i losam zvolnienych šachcioraŭ, jakija adbyvajuć pakarańnie.
U śniežni «Biełaruśkalij» naviedali hiendyrektar Yara Śviejn Tore Chołzieter i jašče niekalki pradstaŭnikoŭ mieniedžmientu kampanii. Razmova na zakrytaj sustrečy z kiraŭnictvam «Biełaruśkaliju» išła pra ŭmovy, jakija treba vykanać, kab adpaviadać kodeksu pavodzin dla dziełavych partnioraŭ Yara. Napiaredadni vizitu Śviejna Tore Chołzietera na sajcie Yara byŭ apublikavany jahony zvarot z nahody situacyi ŭ Biełarusi.
— Niahledziačy na našy pastajannyja namahańni pa dasiahnieńni pieramien praz dyjałoh, my nie ŭbačyli značnych palapšeńniaŭ u stanoviščy rabotnikaŭ «Biełaruśkaliju». My asabliva zaniepakojenyja šmatlikimi paviedamleńniami ab zvalnieńni rabočych, jakija mirna vykazvali svaje demakratyčnyja pravy. < … > My pavinny bačyć istotnaje palapšeńnie ŭmoŭ i adnosin ź piersanałam «Biełaruśkaliju», spynieńnie represij, a taksama palapšeńnie ŭmoŭ biaśpieki pracy, — havaryłasia ŭ zvarocie.
Padčas śniežańskaha vizitu na «Biełaruśkalij pradstaŭniki Yara taksama ŭźniali pytańni achovy pracy, techniki biaśpieki i niaščasnych vypadkaŭ sa śmiarotnym zychodam na pradpryjemstvie. U 2020 hodzie na «Biełaruśkalii» było niekalki padobnych vypadkaŭ. U sakaviku mašyna, u jakoj rabočyja jechali na abjekt, urezałasia ŭ ścianu. Kiroŭca zahinuŭ, šeść čałaviek u ciažkim stanie dastavili ŭ balnicu. Jak raspaviała Tut.by krynica na «Biełaruśkalii», pryčynaj avaryi mahła stać niaspraŭnaść mašyny, skarhi na hetuju techniku pastupali daŭno. U červieni byŭ śmiarotna traŭmiravany 21-hadovy rabočy. U kancy kastryčnika rabotnik «Biełaruśkaliju» paciarpieŭ i trapiŭ u špital z traŭmami, u pačatku listapada zahinuŭ jašče adzin rabotnik.
Biełarusy taksama aktyŭna pakidajuć kamientary ŭ sacsietkach kampanii Yara i prosiać jaje nie zaklučać novy kantrakt z «Biełaruśkalijem».
Kamientary