Raniej my apisvali harotny stan žłobinskaha Biełaruskaha mietałurhičnaha zavoda, jakomu ciaham hoda treba niedzie znajści 3,6 miljarda rubloŭ, kab raźličycca pa daŭhach i kredytach.
Čytajcie: BMZ pahražaje defołt, jaki moža vyklikać łancuhovuju reakcyju
Častku vypłat nieabchodna było rabić užo ŭ lutym. I ŭłady pryjšli na dapamohu BMZ: na sajcie respublikanskaha centralnaha depazitaryja kaštoŭnych papier źjaviłasia infarmacyja ab valutnych ablihacyjach Minfina, jakija vypuścili za dva dni — 28 i 29 studzienia. Suma ablihacyj — 619 miljonaŭ dołaraŭ.
Jość padstavy dumać, što zhadanyja ablihacyi vykuplenyja vialikimi biełaruskimi bankami ŭ jakaści pahašeńnia častki doŭhu BMZ.
Što heta značyć?
Naturalna, što prablema niepłaciežazdolnaha BMZ — heta prablema bankaŭ, bo bank daje ŭ kredyt čužyja srodki. U adnych biare — inšym addaje.
Kali BMZ zbankrutavaŭ by, to paciarpieli b tyja ludzi i firmy, jakija trymajuć svaje srodki ŭ banku-kredytoru. Takaja situacyja davoli typovaja dla biełaruskaj ekanomiki, kali na banki naviešvali pravalnyja vytvorčaści, a banki praź niejki čas «išli» skardzicca ŭradu, što sami lahuć z takimi klijentami.
Časta takuju situacyju vyrašali banalnaj emisijaj, ale ciapier jana palityčna ryzykoŭnaja.
Tamu voś jak tłumačać sens vypusku ablihacyj Minfina znajomyja ź situacyjaj:
«Banki prymusili vykupić valutnyja ablihacyi Minfina, heta forma «biudžetnaj pazyki» — dziaržava pryciahnuła hrošy ad bankaŭ, i hetyja hrošy dała BMZ, a jany adrazu ž viarnulisia nazad, bo imi zakryli častku abaviazkaŭ.
Ciapier hałoŭnaje pytańnie, što heta aznačaje na pobytavym uzroŭni? Vahańni kursa ŭžo adbylisia. Toje pavyšeńnie kursa dołara, jakoje my nazirali apošnija dni, źviazanaje z tym, što banki źbirali nieabchodnyja sumy kab vykupić ablihacyi, praz heta pavialičvaŭsia popyt i tydzień trymaŭsia cisk na valutny rynak», — tłumačać krynicy.
«Na rynku niama stolki valuty, tamu, imavierna, Nacbank vymušany byŭ adkarkavać reziervy. Niešta banki kupili, niešta addali sa svaich hrošaj.
U suchoj rešcie my majem takuju karcinu: pa rachunkach BMZ raźličvajecca Minfin, heta značyć — dziaržava. Kvazidziaržaŭny doŭh staŭ dziaržaŭnym.
A novaja spravazdačnaść pakaža nam, što vyras dziaržaŭny doŭh i źnizilisia zołatavalutnyja reziervy», — dadaje krynica z bankaŭskaha siektara.
Praźmierny rost dziaržaŭnaha doŭhu i źnižeńnie ZVR niasie stratehičnyja ryzyki dla krainy — budzie ciažej zajmać tannyja hrošy na finansavych rynkach. Reziervy biełaruskaha Nacbanka bolš čym ścipłyja. Adnak vykarystańnie ZVR časova zdymaje pahrozu devalvacyi rubla, jakaja stała b niepaźbiežnaj, kali b Žłobin ratavali rublovaj emisijaj.
