Fota z sacyjalnych sietak
Pieršapačatkova suprać Ihnata raspačali kryminalnuju spravu pavodle artykuła 293 KK, ale potym spravu pierakvalifikavali na «bolš miakkuju»: na č. 1 art. 342 KK. Za kratami Ihnat znachodzicca ŭžo paŭhoda. Spravu Ihnata razhladaje sudździa Juryj Maškietaŭ.
Chto taki Ihnat Sidorčyk?
Ihnat pisaŭ vieršy i arhanizoŭvaŭ paetyčnyja viečary. U 2016 hodzie jany z pryjacielami pastavili śpiektakl i vystupili ź im u DK imia Šarko. Apošnim časam pracavaŭ u rekłamnaj kampanii videamantažoram.
U čym abvinavačvajuć Ihnata?
Dziaržaŭnaje abvinavačvańnie ŭ sudzie padtrymlivaje prakuror Dźmitryj Padlipski.
Pavodle viersii abvinavačvańnia, 9 žniŭnia jon «pryniaŭ aktyŭny ŭdzieł u hrupavych dziejańniach, jakija hruba parušajuć hramadski paradak, spałučany ź vidavočnym niepadparadkavańniem pradstaŭnikam ułady, što paciahnuła za saboj parušeńnie pracy transpartu i pradpryjemstvaŭ, šlacham stvareńnia telehram-čata «Prahułka», dla raźmiaščeńnia ŭ im infarmacyi z zaklikami zboru ŭdzielnikaŭ čata ŭ rajonie kinateatra «Biełaruś» dla nastupnaha ŭdziełu ŭ hrupavych dziejańniach, jakija hruba parušajuć hramadski paradak, spałučany ź vidavočnym niepadparadkavańniem pradstaŭnikam ułady, što paciahnuli za saboj parušeńnie pracy transpartu i pradpryjemstvaŭ, šlacham ažyćciaŭleńnia błakavańnia transpartu, z dapamohaj pierakryćcia prajeznaj častki, šlacham znachodžańnia ŭ sčepcy łokciami, tym samym akazvajučy niepadparadkavańnie supracoŭnikam ułady». Pa abvinavačvańni Ihnat pryniaŭ aktyŭny ŭdzieł u hrupavych dziejańniach, jakija hruba parušajuć hramadski paradak, kali 9 žniŭnia na skryžavańni pr. Pieramožcaŭ i vuł. Mielnikajcie «dałučyŭsia da hrupy hramadzian i naŭmysna ŭ telehram-čacie zaklikaŭ hrupu asob sustrecca kala kinateatra «Biełaruś» dla dalejšaha ŭdziełu ŭ hrupavych dziejańniach».
Čas, u jaki pa viersii abvinavačvańnia Ihnat pryniaŭ udzieł u hrupavych dziejańniach: z 21:30 pa 22:30 9 žniŭnia. Ihnat svaimi dziejańniami ŭ hety čas parušyŭ pracu piaci transpartnych srodkaŭ.
Vinu Ihnat pryznaŭ častkova: tolki paćviardžaje toje, što stvaryŭ čat «Prahułka».
Što kaža sam Ihnat na sudzie?
Pa słovach Ihnata, jon stvaryŭ čat kala 6-j ranicy 9 žniŭnia dla taho, kab kamunikavać ź siabrami. Na vypadak, kali adklučać internet prapanavaŭ adrazu ŭsim sustrecca a 9-j viečara kala kinateatra «Biełaruś» i pahutaryć. Udzielnikaŭ u čacie było kala 20-30 čałaviek. Jak stała viadoma na sudzie, Ihnat pisaŭ nie tolki pra sustreču, ale i pra proksi sierviery, i pryłady na vypadak błakavańnia internetu. Ihnat śćviardžaje, što ŭ hetym čacie nikoha nie zaklikaŭ da ŭdziełu ŭ masavych mierapryjemstvach. Jon rastłumačyŭ, što prosta paklikaŭ siabroŭ sustrecca, kab padychać śviežym pavietram.
Ihnat Sidorčyk raspaviadaje ŭ sudzie, što 9 žniŭnia ceły dzień pracavaŭ, vyjšaŭ tolki prahałasavać.
«U 19.30 stelefanavaŭsia ź siabrami, sustrelisia kala Liceja BDU i pajšli ŭ bok kinateatra «Biełaruś».
Z saboj u Ihnata nie było ni simvoliki, ni jakich-niebudź zabaronienych pradmietaŭ, łozunhaŭ jon nie vykrykvaŭ.
«Čuŭ tolki toje, što było niešta kala Steły, kala «Biełarusi» ničoha nie było i nie płanavałasia».
Pa słovach Ihnata, jon prabyŭ kala «Biełarusi» z kampanijaj kala chvilin 30.
«Na skryžavańni Mielnikajcie i Zasłaŭskaj ubačyli natoŭp i častka jaho pabiehła ŭ ich bok. Kala 21:50 spałochalisia i pabiehli nazad praz dvary. Vyrašyli syści ŭ biaśpiečnaje miesca, tamu pajšli ŭ bok Kastryčnickaj vulicy».
Jak raspaviadaje Ihnat, jon bačyŭ na Mielnikajcie śpiecmašyny, ale supracoŭnikaŭ nie bačyŭ. Ihnat na sudzie padkreśliŭ, što jon apalityčny.
Na sudzie analizujuć pierapisku čata. U im majecca pierasłanaje paviedamleńnie z kanała, jaki pryznany ekstremisckim. Paviedamleńnie pierasłaŭ z metaj zaścierahčy siabroŭ, kab nie chadzili tam, dzie zavaruška», — kaža Ihnat.
Sudździa dapytvaje Ihnata z nahody vybaru miesiendžara, proksi siervierach.
U čacie «Prahułka» było kala 100 čałaviek. Sudździa ździviŭsia, što čat byŭ adkryty:
«Čat nie byŭ stvorany z metaj dezarhanizacyi hramadstva ŭ Minsku, tak?»
Sudździa Juryj Maškietaŭ dapytvaje palitviaźnia na sudzie:
— A čamu mienavita telehram?
— Nu zručna prosta.
— A vam było viadoma, što adklučać internet?
— Tak. U mianie praca źviazana ź internetam, tamu moj kiraŭnik skinuŭ u pracoŭny čat proksi sierviery, kab možna było paźbiehnuć adklučeńnia.
— Vami ŭ čat było dadadziena 25 siabroŭ, to-bok astatnich 75 dadali ŭžo vašyja siabry, tak?
— Tak.
— Kali vy chacieli apaviaścić siabroŭ ab sustrečy, to čamu stvarali mienavita adkryty čat?
— Ja ŭ hetym nie raźbirajusia.
Praz 10 chvilin:
— Nu ŭsio ž taki, čamu mienavita ŭ telehramie, a nie ŭ vajbierie, naprykład? I adkul usio ž taki stała viadoma, što budzie błakavacca internet?
Sudździa praciahvaje zadavać pytańni Ihnatu z nahody proksi sierviera:
— Ci tłumačyłasia vami ŭ hetym čacie, jak vykarystoŭvajucca proksi sierviery, kab možna było atrymać dostup da čataŭ?
— Em, jak vykarystoŭvać proksi sierviery?
— Tak, tłumačylisia Vami ci kim-niebudź z udzielnikaŭ čata?
— Mnie patłumačyli na pracy, a ja nikomu.
Sidorčyk raspaviadaje na sudzie, što jany ź siabrami išli pa tratuary, adpaviedna, nie mahli pieraškadžać pracy transpartu, a tym bolš pradpryjemstvaŭ. Pavodle jaho słovaŭ, da jaho supracoŭniki milicyi ź nijakimi patrabavańniami nie źviartalisia i nie padychodzili, tamu što jany «nie parušali hramadski paradak».
Śviatłošumavyja hranaty supracoŭniki vykarystoŭvali, kali ŭžo viarnulisia da kinateatra. Ihnat pisaŭ u čacie: «U piekła taksama nie paleziem, bieražom siabie».
Sidorčyk viarnuŭsia dadomu a 5-j ranicy 10 žniŭnia.
Zatrymali, kali vyjšaŭ pa cyharety
Ihnata zatrymali 10 žniŭnia pablizu kramy «Susiedzi» na praśpiekcie Niezaležnaści. Uviečary 10 žniŭnia jon vyjšaŭ u mahazin za cyharetami, ale dachaty ŭžo nie viarnuŭsia. Praśpiekt u hety čas užo byŭ pierakryty. Jon uziaŭ pašpart, bo viedaŭ, što mohuć pravieryć. Jon pierajšoŭ praz darohu da kramy, u jaho paprasili dakumienty i pravieryli zaplečnik.
Jaho paprasili prajści ŭ słužbovy transpart, dzie skazali razbłakavać telefon, paśla čaho i pavieźli na Akreścina.
Jak patłumačyła jahonaja siabroŭka ŭ sudzie, ich ahulny siabar paviedamiŭ, što patelefanavaŭ Ihnatu, ale słuchaŭku ŭziaŭ nieznajomy čałaviek. Dziaŭčyna vyrašyła pravieryć i patelefanavała sama. Joj adkazaŭ čałaviek z chrypłym hołasam i pradstaviŭsia Ihnatam. Tak siabry zrazumieli, što Ihnat zatrymany.
«Tut niešta strašnaje adbyvajecca, tamu davajcie pojdziem dadomu»
U sudzie ŭ pieršy dzień pasiadžeńnia byli dapytanyja šeść śviedak abarony: siabry Ihnata, jakija znachodzilisia ŭ čacie «Prahułka», a taksama jaho kaleha.
Siabar Ihnata Alaksiej, ź jakim jany siabrujuć kala 10 hadoŭ, raspavioŭ, što jany časta sustrakalisia ź siabrami pozna ŭviečary. Jon taksama znachodziŭsia ŭ čacie «Prahułka»: nie viedaje, chto jaho tudy dadaŭ. Prabyŭ tam 1-2 dnia. 9 žniŭnia sustrakaŭsia ź Sidorčykam i inšymi siabrami na Kastryčnickaj kala 12-j nočy. Chłopcy raspaviadali Alaksieju, jak dajšli da jaho, na što jon skazaŭ: «Dajšli žyvyja i dobra».
Siabroŭka Julija raspaviała, što da 14-j hadziny 9 žniŭnia ŭ čacie «Prahułka» było ŭžo kala 100 čałaviek. Dziaŭčyna patłumačyła ŭ sudzie, što heta byŭ vyklučna čat dla kamunikacyi. 9 žniŭnia jana była ŭ kampanii Ihnata kala kinateatra «Biełaruś». Pavodle jaje słovaŭ, jany prosta siadzieli na parapiecie i hladzieli, byli «naziralnikami», potym vyrašyli pajści pahladzieć, što tam adbyvajecca. Pajšli ŭniz pa vulicy Mielnikajcie, ale na ich pačali biehčy ludzi.
Jašče adzin śviedka Siarhiej raspavioŭ, što jany sustrelisia ź Ihnatam i inšymi chłopcami 9 žniŭnia kala kinateatra «Biełaruś» i sieli pić harbatu, jakuju jon prynios. Ale, pa jaho słovach, «vakoł pačałasia poŭnaja błytanina». Jany spuścilisia pa vulicy Mielnikajcie, i Ihnat prapanavaŭ razychodzicca:
«Tut niešta strašnaje adbyvajecca, tamu davajcie pojdziem dadomu».
U hety momant jany ŭbačyli natoŭp kala 100-200 čałaviek, jaki bieh im nasustrač. Prakuror pasprabavaŭ vyśvietlić, čamu pabiehli razam z astatnimi ludźmi.
Kaleha Ihnata raspavioŭ, što jon skinuŭ u pracoŭny čat proksi sierviera, jakimi zajmajucca sistemnyja administratary. Rastłumačyŭ, što skinuŭ ich dla pracy, kab zaŭsiody byli padłučanyja da sietki.
Praciah pracesu — 16 lutaha.
