Sud Kastryčnickaha rajona vynies rašeńnie pa pazovie niezaležnaha prafsajuza «Hrodna Azot» suprać pradpryjemstva. Trynaccać byłych rabotnikaŭ patrabavali pryznać ich zvalnieńnie niezakonnym, kampiensavać vymušanyja prahuły i maralnuju škodu. Sudździa Dźmitryj Šanin 19 studzienia vyrašyŭ u zadavalnieńni pazovu admović, paviedamlaje Hrodna.Life.
Na pasiadžeńnie pryjšło ź dziasiatak žycharoŭ horada, juryst niezaležnaha prafsajuza Alaksandr Paradkaŭ, troje pazoŭnikaŭ, pradstaŭnik adkazčyka Valery Litvin. Padtrymać rabotnikaŭ pryjechaŭ vice-staršynia Biełaruskaha kanhresa demakratyčnych prafsajuzaŭ Siarhiej Antusievič, były rabotnik «Hrodna Azot».
Sudździa pryznaŭ zvalnieńnie chimikaŭ zakonnym. Pry hetym jon abaviazaŭ AAT «Hrodna Azot» pryvieści farmuloŭku pryčyn zvalnieńnia ŭ dačynieńni da Artura Bohuša, Vadzima Vienskaha, Alaksieja Darahoha, Alaksieja Sidara ŭ adpaviednaści z p. 6.2. Dekreta № 5 «Ab uzmacnieńni patrabavańniaŭ da kirujučych kadraŭ i rabotnikaŭ arhanizacyj».
Rašeńnie suda budzie abskardžvacca, paviedamiŭ pradstaŭnik niezaležnaha prafsajuza.
Chto i čamu sudziŭsia z pradpryjemstvam?
Usie pazoŭniki — byłyja rabotniki «Hrodna Azot». U rozny čas jany napisali zajavu ab dałučeńni da stački. U vyniku 11 chimikaŭ zvolnili za prahuły, dvaich — za parušeńnie pracoŭnaj dyscypliny i pryčynieńnie škody pradpryjemstvu.
Jany źviarnulisia ŭ sud z patrabavańniem pryznać zvalnieńnie niezakonnym, adnavić na pracy i vypłacić kampiensacyi. Svaje straty kožny acaniŭ u sumu ad 3000 da 10 000 rubloŭ.
Pieršaja dasudovaja sustreča bakoŭ prajšła ŭ sudzie Kastryčnickaha rajona Hrodna 11 studzienia.
Jašče da taho, jak sud skončyŭsia, niekatorych azotaŭcaŭ vyklikali ŭ Śledčy kamitet jak śviedak pa spravie pa art. 200 KK (prymus da strajku albo da admovy ad udziełu ŭ joj).
Maŭlaŭ, 20 žniŭnia 2020 hoda na mabilnyja telefony kiraŭnictva AAT «Hrodna Azot» pastupili paviedamleńni z pahrozami zabojstvam u vypadku niaŭdziełu ŭ zabastoŭcy i padtrymki stačkama. Takija ž paviedamleńni pastupili šaści supracoŭnikam u Viber, pry hetym u kožnym padobnym vypadku ŭkazvalisia imiony dziaciej rabotnikaŭ pradpryjemstva, paviedamlali ŭ Śledčym kamitecie.
Ciapier čytajuć
Chto taki Maćviej Bialaj, jakoha nibyta departavali ŭ Biełaruś? Raskazvajem historyju dziŭnaha aktyvista z padazronym minułym3
Kamientary