Dzień abaroncaŭ Ajčyny ŭ niezaležnaj Biełarusi adznačajuć 23 lutaha pa savieckaj tradycyi.
U SSSR heta byŭ Dzień Savieckaj armii.
23 lutaha 1918 hoda pieršyja ŭzbrojenyja farmavańni Čyrvonaj hvardyi dali boj niemcam-kajzieraŭcam na Pskoŭščynie. Pra toje, što boj čyrvonahvardziejcy prajhrali i vymušanyja byli biehčy, zvyčajna nie ŭspaminałasia.
Da Biełarusi data nie maje naŭprostavaha dačynieńnia. Choć u historyi niamała dat, źviazanych sa słaŭnymi vajskovymi pieramohami prodkaŭ.
Naprykład, 8 vieraśnia — hety dzień nazyvajuć Dniom biełaruskaj vajskovaj słavy.
8 vieraśnia 1514 hoda vojska Vialikaha Kniastva Litoŭskaha pad Oršaj pieramahło šmattysiačny ekśpiedycyjny korpus Maskoŭskaj dziaržavy. Heta dało VKŁ pieradyšku: za nastupnyja sto hadoŭ biełarusy mieli Skarynu, Sapiehu, Statut Vialikaha Kniastva i Załaty viek kultury. Ułasna, tady i byli zakładzieny mnohija asnovy našaj nacyjanalnaj cyvilizacyi. I ŭ vajskovym sensie heta była bliskučaja bitva, pradumanaja vydatnym vojenačalnikam — pravasłaŭnym kniaziem Kanstancinam Astrožskim.
Druhaja data — 27 listapada — adnosicca ŭžo da pieryjadu nacyjanalnaha budaŭnictva. Ale jana bolš trahičnaja, heta dzień samaachviarnaści. 27 listapała 1920 hoda słuckija paŭstancy — sialanie, himnazisty, aficery — uźnialisia suprać balšavikoŭ, na abaronu niezaležnaj, samastojnaj Biełaruskaj Narodnaj Respubliki. Jany paciarpieli parazu, ale pamiać pra ich hierojski čyn zastałasia.
Jość jašče 15 lipienia — dzień Hrunvaldskaj pieramohi 1410 hoda, jaki biełarusy śviatkujuć supolna z palakami i litoŭcami. U hety dzień prodki spynili kryžackuju ekspansiju na Vialikaje Kniastva i Polskaje karaleŭstva.
Što ž da 23 lutaha, dyk nie tak daŭno Śviatłana Cichanoŭskaja prapanavała adznačać jaho jak Dzień Hierojaŭ pieramien. «My pavinny kožny dzień nahadvać ludziam, što jany hieroi. Pryviazali da hetaj daty, kab pakazać, što ŭ nas jość sapraŭdnyja abaroncy ajčyny, nie tyja, chto bje. Nadać hetamu śviatu stanoŭčaje značeńnie, — tłumačyła jana. — 23 lutaha daŭno raspyliłasia, bolšaść biełarusaŭ jaho nie źviazvaje z peŭnymi padziejami. Heta prosta dzień, kali vinšujuć mužčyn, hetak ža, jak 8 sakavika vinšujuć žančyn».
Kamientary