Sud nad Kaciarynaj Barysievič i Arciomam Sarokinym. Dapytali Marynu Zołatavu
23 lutaha — treci dzień u sudovym pracesie pa spravie žurnalistki Tut.by Kaciaryny Barysievič i doktara Balnicy chutkaj miedycynskaj dapamohi Arcioma Sarokina.
Sudovaje pasiadžeńnie ŭ aŭtorak pryznačanaje na 10.15. Spravu razhladaje sud Maskoŭskaha rajona Minska ŭ budynku Doma pravasudździa na vulicy Siamaški, nahadvaje Tut.by.
Kaciarynu Barysievič i Arcioma Bandarenki zaviali ŭ zału ŭ 10.04. Siońnia buduć taksama davać pakazańni śviedak supracoŭniki Tut.by.
Taksama projdzie dopyt doktara, jaki ahladaŭ Ramana Bandarenku, kali toj pastupiŭ u pryjomny pakoj.
Na sud u jakaści śviedki taksama vyklikali stryječnuju siastru Ramana Bandarenki Volhu. Jana skazała, što ŭvieś čas, pakul Raman znachodziŭsia ŭ balnicy, svajaki publična raspaviadali pra jaho stan.
Paśla, kali źjaviłasia infarmacyja ab tym, što nibyta jon byŭ pjany, siamja dała zhodu na publikacyju danych łabaratornych daśledavańniaŭ.
U ich, nahadajem, pakazvałasia, što ŭ kryvi Ramana nie było vyjaŭlena etanołu. Volha kaža, što jana asabista ŭzhadniała z Kaciarynaj Barysievič hetuju infarmacyju.
Hałoŭny redaktar Tut.by Maryna Zołatava taksama vystupiła ŭ sudzie śviedkam. Jana ličyć, u spravie Kaciaryny Barysievič i Arcioma Sarokina «niama składu złačynstva, i heta zusim palityčny praces».
— Kacia rabiła svaju pracu: jana praviarała infarmacyju — toje, što pavinien rabić luby žurnalist. Adzinyja ludzi, u jakich mahli ŭźniknuć pretenzii, — heta blizkija Ramana Bandarenki. Ale nijakich pretenzij ź ich boku nie było. Kacia vielmi kruty žurnalist i, napeŭna, najlepšy ŭ krainie sudovy reparcior. Da jaje tekstaŭ nikoli ni ŭ kaho nie ŭźnikała pretenzij. Naohuł, prosta dzivišsia, jak možna pisać tak apieratyŭna, dakładna, z uvahaj da niejkich cikavych detalaŭ. Tamu vielmi dziŭna, što hetaja situacyja zakranuła Kaciu. Pamyłki robiać usie, ale Kacia, zdajecca, ci ich nie robić nikoli, abo ździajśniaje mienš za ŭsio. Całkam vidavočna, što 13 listapada tema hvałtoŭnaj śmierci Ramana Bandarenki abmiarkoŭvałasia ŭsiudy. Infarmacyja, što ŭ jaho kryvi nie było vyjaŭlena ałkaholu, raspaŭsiudziłasia telehram-kanałami ranicaj. Toje, što zrabiła Kacia, — usiaho tolki pravieryła hetuju infarmacyju — prakamientavała pierad pasiadžeńniem Maryna Zołatava.
Vystupić taksama śviedkam pryjechała žančyna z «płoščy Pieramien» — jana adna z tych, chto apošnim bačyŭ Bandarenku žyvym. Pra što jaje mohuć pytacca ŭ sudzie, nie viedaje.
Sudździa — Śviatłana Bandarenka, dziaržabvinavaŭca — Ludmiła Ivanienka. Arcioma Sarokina abaraniaje advakat Volha Baciuk, Kaciarynu Barysievič — Andrej Mačałaŭ i Michaił Badnarčuk.
Praces prachodzić u zakrytym režymie.
Abvinavačvajuć Kaciarynu i Arcioma pavodle častki 3 artykuła 178 «vydavańnie miedycynskaj tajamnicy, što paciahnuła ciažkija nastupstvy». Užo bolš za try miesiacy, ad 19 listapada, jany znachodziacca za kratami. Barysievič i Sarokinu pahražaje da troch hadoŭ źniavoleńnia.
Kamientary