«Vykrykvaŭ łozunhi, uźnimaŭ ruki, znachodziŭsia ŭ pieršych šerahach»: 20-hadovaha pakarali tryma hadami
Sud Leninskaha rajona pakaraŭ palitźniavolenaha antyfašysta 20-hadovaha Uładzisłava Zianieviča tryma hadami abmiežavańnia voli z nakiravańniem va ŭstanovu adkrytaha typu (chimii). Prysud vyniesła sudździa Maryna Zapaśnik, paviedamlaje spring96.org.
Uładzisłava Zianieviča abvinavacili ŭ tym, što 1 listapada (marš u Kurapaty) jon naŭmysna aktyŭna ŭdzielničaŭ u hrupavych dziejańniach, jakija parušajuć hramadski paradak. A mienavita — «udzielničaŭ u niesankcyjanavanym mierapryjemstvie, vykrykvaŭ łozunhi, uźnimaŭ ruki, znachodziŭsia ŭ pieršych šerahach mierapryjemstva, vychodziŭ na prajeznuju častku. Pry hetym jon nie reahavaŭ na patrabavańni supracoŭnikaŭ milicyi spynić supraćpraŭnyja dziejańni. Heta paciahnuła za saboj parušeńnie raboty hramadskaha transpartu», — ličyła abvinavačvańnie.
Uładzisłaŭ Zianievič vinu nie pryznaŭ.
Admoviŭsia ad śviedčańniaŭ i apošniaha słova
Padčas śledstva Uładzisłaŭ Zianievič raspavioŭ, što 1 listapada ŭbačyŭ natoŭp, jaki ruchaŭsia ŭ bok stancyi mietro «Uschod» pa prajeznaj častcy i tratuary. Sam palitviazień byŭ zatrymany kala parka Čaluskincaŭ. Adnak jon adznačyŭ, što nie parušaŭ hramadski paradak, a byŭ zatrymany, kali viartaŭsia dadomu.
U dalejšym palitviazień admoviŭsia davać śviedčańni, karystajučysia pravam nie śviedčyć suprać siabie. Admoviŭsia jon i ad apošniaha słova.
Pazoŭ — bolš za dziesiać tysiač
Piśmovymi materyjałami spravy źjaŭlajucca danyja z telefona chłopca, pratakoły ahladu.
Taksama byŭ prahledžany videazapis, zrobleny ŭ miescy incydentu: sudździa była ŭpeŭniena, što ŭ adzin z momantaŭ na im možna razhladzieć tvar abvinavačanaha, jaki ŭźnimaje dva palcy ŭvierch. Taksama na videa bačny momant, kali Zianievič pajšoŭ na prajeznuju častku.
Minsktrans paprasiŭ spahnać ź Zianieviča majomasnuju škodu ŭ pamiery 10 tysiač 689 rubloŭ 76 kapiejek, a taksama dziaržpošlinu za pazoŭ. Palitviazień pazoŭ nie pryznaŭ.
Prakuror patrabavaŭ try hady chimii. Taki prysud i vyniesła sudździa Maryna Zapaśnik. Pazoŭ Minsktransa vyłučany ŭ asobnuju hramadzianskuju vytvorčaść.
Ci moh Zianievič być u miescy, paznačanym u abvinavačańni?
Advakat skazaŭ, što ŭ materyjałach spravy adsutničajuć dokazy viny Zianieviča. Taksama jon adznačyŭ, što jaho padabaronny nie moh znachodzicca va ŭkazannym u abvinavačańni miescy: suadnosna z pratakołam zatrymańnia pa administracyjnaj spravie pa art. 23.34, u hety čas jon byŭ zatrymany. «Usio abvinavačańnie budujecca na dvuch videazapisach, — skazaŭ advakat. — Pryčym nielha dakładna skazać, što na ich — mienavita moj padabaronny».
Kamientary