Novyja fiłarety. Ctudenty z 15 biełaruskich univiersitetaŭ abjadnoŭvajucca ŭ adzinuju asacyjacyju
Asacyjacyja studentaŭ abjadnoŭvaje 15 univiersitetaŭ. Siarod ich — BDU, BDUIR, mieduniviersitet, Akademija mastactvaŭ, rehijanalnyja VNU. Usio, kab adstojvać pryncypy demakratyčnaści, zakonnaści, svaje pravy i svabody. Tak biełaruskaja moładź vyrašyła praciahnuć tradycyi tavarystvaŭ fiłamataŭ i fiłaretaŭ, studenckaha sajuza.
Pa sutnaści heta pierazapusk niekali kultavaha Zadzinočańnia biełaruskich studentaŭ (nazvu pakidajuć tuju ž). Tolki ciapier u jaho ŭvachodziać nie asobnyja aktyvisty, a stačkamy, jakija pradstaŭlajuć intaresy svaich univiersitetaŭ. Pradstaŭnikoŭ tudy abirajuć studenty.
«U pieršuju čarhu my chočam abjadnoŭvać ludziej. Jak my ŭžo mahli pierakanacca — u adzinstvie siła. Nieabchodna budavać haryzantalnyja suviazi, abjadnoŭvać ludziej jak u łakalnyja supolnaści (u miežach adnaho ŭniviersiteta), tak i ŭ bolš hłabalnyja. Kali nam udasca achapić našaj idejaj krytyčnuju masu moładzi, z našym mierkavańniem niemahčyma budzie nie ličycca. Nu prosta nielha ihnaravać dziasiatki tysiač studentaŭ», — kaža Volha Biełamutava, lidar ad BDUFK.
Prablemy va ŭniviersitetach padobnyja.
«Jość pytańni z pravam na schody i praviadzieńniem niejkich akcyj, navat biez pramoj palityčnaj tematyki. Ideołahi prymušajuć vykładčykaŭ apaznavać studentaŭ na fota i videa, pisać na ich charaktarystyki, studentaŭ vyklikajuć u milicyju. U epidemiju karanavirusu hrupy nie pieravodziać na dystancyjnaje navučańnie», — pieraličaje Alaksandr Klujeŭ, jaki pradstaŭlaje BDUIR.
«Kali pa zvanku ź ministerstva adličvajuć studentaŭ, zapałochvajuć vykładčykaŭ, heta stvaraje žachlivyja ŭmovy dla pracy i vučoby. Jak možna atrymlivać jakasnuju vyšejšuju adukacyju, kali svaboda dumki akazvajecca zabaronienaj? Navuka patrabuje pierš za ŭsio śmiełych dumak, jakich u nas va ŭniviersitecie bajacca, jak ahniu», — miarkuje Volha.
Pa infarmacyi supolnaści, za apošnija paŭhoda było zatrymana bolš za 400 studentaŭ, na 27 zaviali kryminalnyja spravy. Viadoma pra 135 faktaŭ adličeńnia. Rekadsmien pa sutkach — BDUIR. Pa słovach Alaksandra, adličyć mohuć paśla dźviuch vymoŭ. U niekatorych navučencaŭ praviarajuć sacsietki na kalapratesnuju tematyku.
Na što asacyjacyja zmoža paŭpłyvać?
«Pierš za ŭsio, studenty mohuć i pavinny ŭpłyvać na ŭsio ŭ svaim univiersitecie. A ŭvohule, studenty, jak pisaŭ Trocki, — revalucyjny kłas, nam niama čaho hublać. Tady, kaniečnie, byli inšyja časy i mnohaje źmianiłasia, ale ŭsio roŭna studenty — niejki duchoŭny łakamatyŭ pratestu», — ličyć Alaksandr.
«Studenty časta stanoviacca tymi, chto daje šturšok vialikim pieramienam. Jano i zrazumieła: my jarkija, hučnyja, našy akcyi pryciahvajuć uvahu, nas nielha nie pačuć, nielha ihnaravać. Niama adzinaha miechanizmu baraćby z dyktaturaj, ale, jak my ŭsie paśpieli vyvučyć za hetaje leta, «nam treba dziaŭbści-dziaŭbści-dziaŭbści hetuju ŭładu», čym i zajmajecca biełaruskaje studenctva», — dadaje Volha.
Padać zajaŭku, kab dałučycca, možna budzie praz sajt abjadnańnia. «Koračak» siabram nie vydajuć, brsmaŭcaŭ prymajuć.
«Pry ŭmovie, što jany padzialajuć našyja mety i kaštoŭnaści, — adznačaje Alaksandr. — Ale sam fakt znachodžańnia ŭ BRSM — padtrymka režymu, tamu my možam adrazu razychodzicca na hetym punkcie».
Kamientary