Usio bolš krain vykarystoŭvajuć płastykavaje śmiećcie jak dadatak da asfaltu. Vychodziać daŭhaviečnyja darohi
U stalicy Indyi Deli mašyny jeździać pa tonach płastykavych pakietaŭ i butelek. Za adzin kiłamietr kiroŭca prajazdžaje prykładna pa tonie płastykavaha śmiećcia. Nie, havorka nie pra śmiećcie. Płastyk tut dabaŭleny ŭ asfalt.
Hetaja ekśpierymientalnaja daroha złučaje Deli z horadam Mirut. Jaje prakłali z vykarystańniem sistemy, raspracavanaj Radžahapałanam Vasudevanam (Rajagopalan Vasudevan), prafiesaram chimii ŭ inžyniernym Kaledžy Tyaharadžar. Navukoviec raspracavaŭ schiemu, pa jakoj 10% bitumu zamianiajecca pierapracavanym płastykavym śmiećciem.
Indyja źjaŭlajecca lidaram pa ekśpierymientach z płastykavymi darohami z 2000-ch hadoŭ. Adnak usio bolš krain pačynajuć pierajmać hety prykład. Budaŭnictva płastykavych daroh maje źnizić kolkaść płastyku ŭ pryrodzie, a taksama palepšyć jakaść i tryvałaść daroh, piša BBC.
Amierykanskaja firma Dow realizoŭvaje prajekty płastykavych daroh u ZŠA.
U Vialikabrytanii takija darohi źjavilisia ŭ 2019 hodzie dziakujučy kampanii MacRebur, jakaja raniej prakładaje płastykavyja darohi ŭ roznych krainach, ad Słavakii da Paŭdniovaj Afryki.
U 2018 hodzie ŭ Niderłandach kampanija PlasticRoad pabudavała pieršuju ŭ śviecie rovarnuju darožku całkam ź pierapracavanaha płastyku, biez kropli bitumu. Kampanija sarciruje, myje i zdrabniaje płastykavaje śmiećcie, paśla čaho vyrablaje poliprapilen — vid płastyku, ź jakoha vyrablajuć zakrutki butelek, upakoŭki kaśmietyki i płastykavyja sałominki.
Takim čynam, darohi ad PlasticRoad amal całkam budujucca ź pierapracavanaha płastyku ź vielmi tonkim słojem minieralnaha zapaŭnialnika. Na kožny kvadratny mietr takoj darohi idzie 25 kh płastyku.
U Indyi vykidvajuć ažno 3,3 miljona ton płastyku štohod. Heta i stała adnoj z hałoŭnych matyvacyj, kab prystasavać płastykavaje śmiećcie da budaŭnictva daroh.
Indyjski inžynier prydumaŭ praces, jaki nie patrabuje vysokatechnałahičnaha abstalavańnia. Spačatku zdroblenaje płastykavaje śmiećcie raskidvajuć na zapaŭnialnik ź piasku i ščebieniu, paśla nahravajuć da 170 °C — hetaj tempieratury dastatkova, kab płastyk raspłaviŭsia. Raspłaŭleny płastyk tonkim słojem pakryvaje zapaŭnialnik. Źvierchu dadajuć nahrety bitum, jaki spryjaje zaćvierdziavańniu zapaŭnialnika, u vyniku čaho atrymlivajecca jakasnaja i tryvałaja daroha.
U hetu sumieś možna dadajuć roznyja vidy płastyku: pakiety, adnarazovyja kubački, šmatsłojnyja plonki, jakija ciažka apracoŭvać, polietylen — usio heta trapiła na darohi Indyi.
Technałohija zusim prostaja: pierad vykarystańniem płastyku nie treba jaho sartavać abo myć pierad drabnieńniem.
Aŭtary technałohij śćviardžajuć, što płastyk pavialičvaje daŭhaviečnaść daroh, zapavolvaje znos darožnaha pakryćcia i ŭźniknieńnie jamak. Samyja pieršyja płastykavyja darohi ŭ Indyi źjavilisia 10 hadoŭ tamu, na ich pakul što niama nivodnaj jaminy.
Płastykavyja darohi mohuć vytrymlivać vialikuju nahruzku i intensiŭny ruch. I ich nie razmyvaje doždž.
Pa raźlikach Vasudevana, vykarystańnie płastyku ŭ darohach, zamiest jaho spalvańnia, značna pamienšyć vykidy vuhlakisłaha hazu. Zharańnie kolkaści płastyku, jaki vykarystoŭvajecca ŭ adnym kiłamietry darohi, pryvodzić da vykidu troch ton vuhlakisłaha hazu.
U 2015 hodzie Vasudevan biaspłatna pieradaŭ uradu patent na hetuju sistemu. Z taho času indyjskaje kiraŭnictva zrabiła abaviazkovym vykarystańnie płastykavaha śmiećcia pry budaŭnictvie daroh kala vialikich haradoŭ z nasielnictvam bolš za 500 tysiač. Usiaho ŭ krainie prakładziena 2500 km płastykavych daroh, i hetaja ličba tolki raście.
Vasudevan pierakanany, što płastykavyja darohi buduć stanavicca ŭsio bolš papularnymi nie tolki pa ekałahičnych pryčynach, ale i tamu, što jany daŭhaviečnyja.
Ciapier čytajuć
«Jany čamuści dumajuć, što ich zaraz zhvałciać». Prapahanda kinułasia tušyć abureńnie biełarusaŭ 150 tysiačami pakistancaŭ23
Kamientary