15 sakavika sudździa Dźmitryj Šuryn pryznačyŭ vaśmi žycharam horada pakarańnie ad 1,5 hoda chatniaj chimii da 1 hoda i 8 miesiacaŭ kałonii, paviedamlajuć pravaabaroncy-viasnoŭcy.
Mienavita takoje pakarańnie prasili prakurory Juščuk i Lašok.
Sudzili ŭžo druhi dziasiatak asudžanych, ale pakarańnie ŭ vyhladzie kałonii pryznačana ŭpieršyniu.
Usiaho pa spravie prachodziać kala 50 čałaviek, ich sudziać dziasiatkami. Heta samy masavy palityčny praces u historyi horada. Zała suda siońnia nie źmiaściła ŭsich achvotnych padtrymać abvinavačanych.
Pratesty ŭ Breście byli samymi masavymi z abłasnych haradoŭ.
Čytajcie taksama: My padličyli kolkaść palitkryminalnikaŭ pa abłaściach. Ličby ŭražvajuć
13 vieraśnia pratest byŭ absalutna mirny, ludzi patrabavali adstaŭki Alaksandra Łukašenki vybaraŭ biez falsifikacyj.
Tralejbusny park naličyŭ ad hetaha škodu 619 rubloŭ 55 kapiejek, aŭtobusny — 40 r. 37 kap. Za hetyja 660 rubloŭ piać dziasiatkaŭ čałaviek adpraŭlajuć u kałonii i na chimiju.
Prysud nie ŭstupiŭ u zakonnuju siłu i moža być abskardžany.
25 lutaha ŭ sudzie Leninskaha rajona abviaścili prysud pieršym dziesiaci abvinavačanym pa «karahodnaj» spravie. Tady dziaržabvinavačańnie zapytała dla ŭsich chimiju — z nakiravańniem i biez nakiravańnia ŭ vypraŭlenčuju ŭstanovu adkrytaha typu. Sudździa suda Leninskaha rajona Bieraścia Śviatasłaŭ Kalina praktyčna całkam pahadziŭsia z pazicyjaj prakuroraŭ — tolki dla studentki Maryny Sirecan jon pryznačyŭ 1 hod i 3 miesiacy chatniaj chimii zamiest zapytanych 1 hoda i 6 miesiacaŭ.
Piać dziasiatkaŭ čałaviek, jakija prachodziać pa «spravie karahodaŭ», sudziać hrupami pa 10 čałaviek.
Voś śpis asudžanych 15 sakavika.
- Dźmitryj Bunievič — 1 hod i 8 miesiacaŭ kałonii ahulnaha režymu;
- Alaksiej Arciecki — 1,5 hoda kałonii ahulnaha režymu;
- Dźmitryj Abramuk i Vital Bruch — 2 hady «chimii»;
- Alaksiej Baranoŭski, Dźmitryj Kačurka i Uładzimir Tałatyńnik — 1,5 hoda «chimii»;
- Hienadź Misiuta — 1,5 hoda chatniaj chimii.
Što tyčycca abvinavačanych Valanciny Žukoŭskaj i Siarhieja Naliŭki, to razhlad ich spraŭ budzie prachodzić asobna, bo jany nie naviedvali niekatoryja pasiedžańni pa stanie zdaroŭja.
Usiaho ŭ krainie viadoma 944 fihuranty palityčna matyvavanych kryminalnych spraŭ. Adnak realnaja ličba budzie našmat bolšaj, bo viadoma pra jak minimum 2408 kryminalnych spraŭ palityčnaha charaktaru. Akramia taho, pravaabaroncy zafiksavali bolš za 33 500 zatrymańniaŭ. Heta samyja maštabnyja palityčnyja represii ŭ Jeŭropie ad času fašysckaj dyktatury «čornych pałkoŭnikaŭ» u Hrecyi 1970-ch.