20-hadovy žychar Mahilova atrymaŭ 20 hadoŭ kałonii ŭzmocnienaha režymu za zhvałtavańnie i zabojstva z asablivaj žorstkaściu 16-hadovaj dziaŭčyny, jakoje adbyłosia ŭ červieni minułaha hoda na bierazie Dźviny ŭ Navapołacku, paviedamlaje Tut.by sa spasyłkaj na navapołacki telekanał «Źviazda».
SK paviedamlaŭ, što ŭ červieni minułaha hoda 20-hadovy žychar Mahilova byŭ u kamandziroŭcy ŭ Navapołacku. Viečaram chłopiec vypiŭ i paznajomiŭsia ŭ sacyjalnaj sietcy z 16-hadovaj dziaŭčynaj. Maładyja ludzi sustrelisia na haradskoj płoščy, schadzili ŭ kramu i pajšli adpačyvać na bierah Zachodniaj Dźviny.
Tam chłopiec zhvałciŭ dziaŭčynu, źbiŭ jaje da śmierci, a kali jana pamierła, zanios cieła ŭ zaraśniki travy ŭ race i schavaŭsia.
Ranicaj chłopiec schadziŭ da raki, znajšoŭ vopratku achviary, sabraŭ jaje ŭ pakiet i źjechaŭ u Mahiloŭ.
Pa darozie ź im pastajanna źviazvalisia pa telefonie supracoŭniki milicyi, adnak jon nie braŭ słuchaŭku. Pryjechaŭšy ŭ Mahiloŭ, małady čałaviek zrazumieŭ, što jaho dačynieńnie da źniknieńnia dziaŭčyny viadoma milicyjantam. Jon pajšoŭ u SK i pryznaŭsia ŭ złačynstvie. Tam jaho zatrymali.
Chłopiec sprabavaŭ zabłytać śledstva, spasyłaŭsia na pravały ŭ pamiaci, kazaŭ, što zabivać nie chacieŭ. Adnak ekśpiertyza pakazała, što dziaŭčyna pamierła ad traŭmatyčnaha šoku paśla mnostva ŭdaraŭ.
Kamientary